Сыбайлас жемқорлыққа қарсы іс-қимыл агенттігі "Азық-түлік корпорациясының" басшыларын ұстады

Азық-түлік корпорациясының өңірлік филиалдары мен ведомстволық бағынысты ұйымдарының бірқатар басшылары сыбайлас жемқорлыққа әшкереленді. Бұл туралы ҚР Сыбайлас жемқорлыққа қарсы іс-қимыл агенттігінің баспасөз қызметі хабарлады.

"Астық ұрлау фактісін жасыру үшін пара беруге тырысқанда астық базаларының бұрынғы директоры мен оның көмекшілері әшкереленді. Қазіргі уақытта күдіктілер соттың санкциясымен қамауға алынды. Сотқа дейінгі тергеу жүргізілуде", - деп хабарлады ведомстводан.

Сондай-ақ, Сыбайлас жемқорлыққа қарсы іс-қимыл агенттігінің мәліметінше, Астанада қаржы департаментінің директоры мен "Азық-түлік корпорациясы" АҚ бас менеджеріне қатысты тергеу аяқталды.

"Тергеу барысында олар бидай түріндегі тауарлық несие бергені үшін коммерциялық ұйым басшысынан 800 мың теңге сомасында пара алғаны анықталды. Айыпталушылар сотқа тартылды", - деп нақтылады ведомстводан.

Бұдан басқа, арнайы жедел-іздестіру іс-шаралары кешенінің нәтижелері бойынша "Азық-түлік корпорациясы" Қостанай облыстық өкілдігінің директоры әшкереленді. Ол ЖШС өкілінен 100 мың тонна бидай көлемінде тауарлық несие алу туралы мәселені оң және кедергісіз шешкені үшін 350 мың теңге сомасында пара алды деп күдіктелуде. Сотқа дейінгі тергеу жүргізілуде.