Бейнеу астық терминалы жұмысын қайта бастайды

Маңғыстау облысында 2018 жылдан бері тоқтап тұрған Бейнеу астық терминалының қызметін қайта жандандыру жұмыстары басталды. Кәсіпорынның жаңа иесі "Еуразия Транс Логистик" ЖШС болды. Бұл туралы Маңғыстау облысы әкімінің баспасөз қызметі хабарлады.

Маңғыстау облысының әкімдігі "Халық" қорынан қаржы алып, "Каспий" әлеуметтік-кәсіпкерлік корпорациясымен бірлесіп астық терминалын қайта бастауға және одан әрі жұмыс істеуге бағытталған қызметті үйлестіруді қамтамасыз етеді.

Кәсіпорынның жобалық қуаты 100 мың тонна астықты біржолғы сақтауды, сондай-ақ тәулігіне 400 тонна ұн өндіруді құрайды. Терминалдың жүк айналымы жылына 2 млн тоннаны құрауы мүмкін.

Сондай-ақ, терминалдың қуаттылығы жылына 25 мың тонна кебек өндіруге мүмкіндік береді – бұл өңірдің жылдық қажеттілігі.

"Суық мезгілде кебек пен құрама жемге деген қажеттілік жыл сайын 25-28 мың тоннаға жетеді. Бейнеу астық терминалын іске қосу Маңғыстау облысында бұл сұранысты толығымен қанағаттандыруға мүмкіндік береді. Қазіргі таңда кебек Қостанай облысынан, Орал мен Ресейден жеткізілуде. Ресейде оларды өндіру арзанырақ болса да, тасымалдау өнімнің өзіндік құнын арттырады. Жергілікті өндіріс тасымалдау шығындарын қысқарту есебінен өзіндік құнын 15-20%-ға төмендетуге мүмкіндік береді. Осылайша, біз басқа өңірлерден жеткізуден бас тарта аламыз", - деп атап өтті Маңғыстау облысының Ауыл шаруашылығы басқармасының басшысы Қазбек Тәшімов.

Өз кезегінде "Еуразия транс логистик" ЖШС директоры Жанбырбай Доспаев Бейнеу астық терминалының өнімдерін Өзбекстанға, Тәжікстанға және Ауғанстанға экспорттауды жоспарлап отырғанын айтты.

"Қазақстандық астық пен ұнды Ауғанстанға жеткізу көлемін ұлғайту үшін Бейнеу терминалының қуатын қарауды бұған дейін Қазақстан премьер-министрінің орынбасары Серік Жұманғарин Ауғанстан премьер-министрінің орынбасары Абдулании Барадармен кездесуде ұсынған болатын. Қазақстан бұл тауарлардың ауған нарығына сенімді жеткізушісі болған және болып қала беретіні атап өтілді. Терминалда барлық қажетті өндірістік инфрақұрылым бар. Ол өнімді экспортқа одан әрі тасымалдау үшін құрлықтағы ауыстырып тиеу терминалы-жинақтағыш функцияларын орындай алады. Осыған байланысты маңғыстау өнімінің Ауғанстанға экспортқа шығуы біздің облысқа ғана емес, жалпы Қазақстанға да мультипликативті экономикалық әсер етеді", - деді Жаңбырбай Доспаев.

Бейнеу астық терминалы 2010 жылы пайдалануға берілді. 16 гектар аумақта астық өңдеу және құрама жем өндіру бойынша автоматтандырылған цехтар, элеватор орналастырылды. Қазақстан президенті Қасым-Жомарт Тоқаев бұған дейін Маңғыстау облысының әлеуметтік-экономикалық дамуы аясында терминалды қалпына келтірудің маңыздылығын атап өткен болатын.