Қазақстанда 100-ден астам ірі сүт фермалары салынады

Қазақстан үкіметі ірі сүт-тауар фермаларын салу жөніндегі жобаларға жеңілдікпен несие беру түрінде мемлекеттік қолдау көрсетеді. Осы мақсаттарға таяу жылдары республикалық бюджеттен 213 млрд теңге бөлу жоспарлануда. Бұл туралы бүгін үкімет отырысында Ауыл шаруашылығы министрі Ербол Қарашөкеев мәлімдеді.

Сүт өнімдерін өндіруге арналған шикізат базасын кеңейту үшін елімізде өңірлік әлеуметтік-кәсіпкерлік корпорациялар арқылы ірі тауарлық-сүт фермаларын салуды жеңілдікпен қаржыландыру бойынша СҚО тәжірибесі тарала бастады.

"Жобаны іске асыру нәтижесінде отандық сүт зауыттары сапалы шикізатпен қамтамасыз етіледі және сүт бойынша импортқа тәуелділік айтарлықтай төмендейді. Осы мақсаттарға 2023 жылға өндірістік қуаты жылына 373 мың тонна сүт өндіретін 65 сүт-тауар фермасын құруға 100 млрд теңге бөлу жоспарлануда. Алдағы жылдарға қосымша 50 СТФ салу жоспарланып отыр, оған 113 млрд теңге қажет", - деді Ербол Қарашөкеев.

Ол бүгінгі таңда шикізат базасының дамымауы сүт өнімдерін өндірудегі басты проблема болып қала беретінін атап өтті. 2022 жылы Қазақстанда сары май, сүт, ірімшік, сүзбе және ашытылған сүт өнімдері өндірісі қысқарды. Өткен жылы ірімшік пен сүзбе бойынша өз өндірісі есебінен қамтамасыз ету 56% - дан 53% - ға дейін төмендеді.