Мәслихат депутаты АӨК-де 450 млн теңгеден астам субсидия ұрлады

Ақтөбеде облыстық мәслихаттың бұрынғы депутаты өңірдің АӨК-ін субсидиялауға бөлінген 450 млн теңгеден астам қаражатты ұрлаған. Алаяқтық үшін ол алты жылға бас бостандығынан айырылды. Бұл туралы Ақтөбедегі №2 соттың баспасөз қызметінен хабарлады.

Соттың мәліметінше, 2020 жылы Н. шаруа қожалығының басшысы ретінде Аграрлық несие корпорациясына несие желісін ашуға өтініш берген. Кепілді қамтамасыз ету ретінде ол өтінімге 1 200 бас ІҚМ сатып алу шартын қоса берген, бұл ретте мал іс жүзінде сатып алынбаған. Нәтижесінде ол АНК-дан 390 млн теңге алып, оны өз қалауы бойынша пайдаланған.

Бұдан әрі, 2021-2022 жылдар аралығында экс-депутат өңірдің ауыл шаруашылығы басқармасының қызметкерлерін жемшөпке субсидия алуға және ІҚМ бордақылауға немесе ет комбинатына тапсырған кезде шығындардың құнын арзандатуға жалған өтінімдер беру арқылы жаңылыстырған. Бұл ретте іс жүзінде шаруашылықта мал болмаған. 67 млн теңге сомасында алынған қаражатты ол қолма-қол ақшаға айналдырып, өз қажеттіліктеріне жұмсаған.

Сот үкімімен Н. алаяқтық жасағаны үшін кінәлі деп танылды және оған 10 жыл мерзімге коммерциялық ұйымдарда ұйымдастырушылық-өкімдік және материалдық-жауапты функцияларға байланысты лауазымдарды атқару құқығынан айыра отырып, 6 жыл мерзімге бас бостандығынан айыру түріндегі жаза тағайындалды. Үкім заңды күшіне енген жоқ.