Қазақстандық астықтың Иранға экспорты 30 есе өсті

2024 жылдың қорытындысы бойынша қазақстандық астықтың Иранға экспорты өткен жылмен салыстырғанда 30 есе өсті және бірнеше жыл ішінде алғаш рет 500 мың тоннаны құрады. Ауыл шаруашылығы өнімдерін сатудағы ынтымақтастықты ауыл шаруашылығы министрі Айдарбек Сапаров Иранның Fawakeh Trading Company инвестициялық компаниясының бас директоры Хассан Хайдаринассабпен кездесуде талқылады, деп хабарлады ҚР АШМ баспасөз қызметінен.

"Иранға астық жеткізу қайта басталды. Біз Иран бизнесіне жан-жақты қолдау көрсетуге және отандық ауыл шаруашылығы өнімдерінің экспортын кеңейту үшін барлық жағдай жасауға дайынбыз", - деді Айдарбек Сапаров.

Өз кезегінде Хассан Хайдаринассаб жыл сайын астық импортын 3 млн тоннаға дейін ұлғайтуға мүдделі екенін атап өтті.

Ауыл шаруашылығы министрлігі ирандық инвесторлардың серіктесі Азық-түлік корпорациясы бола алатынын атап өтті. Мемлекеттік астық операторы бидай, арпа, зығыр, рапс, жасымық, бұршақ, сондай-ақ оларды қайта өңдеу өнімдерін қоса алғанда, қазақстандық агроөнімдердің кең желісін жеткізуді ұйымдастыру бойынша барлық мүмкіндіктерге ие. Азық-түлік корпорациясы сонымен қатар ауылшаруашылық өнімдерін шетелге жіберу үшін жеке агроөндірушілерді тартуда үлкен тәжірибеге ие және ұзақ мерзімді келісімшарттар жасауға дайын.

Кездесу қорытындысы бойынша тараптар АӨК саласындағы өзара тиімді сауда ынтымақтастығын одан әрі дамыту жөнінде бірлескен ұсыныстар әзірлеуге келісті.

Қазақстан дәстүрлі түрде Иранға агроөнеркәсіптік сектордың өнімдерін, атап айтқанда арпа, күнжара, қой немесе ешкі еті, жүгері және басқаларын жеткізеді. Иран Қазақстанға негізінен жемістер, құрма, інжір, авокадо, ананас, жаңғақтар, минералды су мен көкөністерді жеткізеді.