Қазақстанда тағы 2 млн гектар жерді алып қою жоспарлануда

Қазақстанда 2025 жылы пайдаланылмайтын ауыл шаруашылығы мақсатындағы жерлерді мемлекеттік меншікке қайтару бойынша жұмыс жалғасады. Жыл жоспары - 2 млн га. Өткен 2024 жылы жер пайдаланушылардан 2 млн гектардан астам жер алынды.

"2025 жылы біз 2 млн гектар пайдаланылмаған ауыл шаруашылығы жерін мемлекет меншігіне қайтаруды жоспарлап отырмыз. Бұл жер ресурстарын ұтымды пайдалану және оларды шаруашылық айналымға тарту үшін негіз болады", - деді әлеуметтік желіде АШМ-нің Жер ресурстарын басқару комитетінің төрағасы Мұрат Теміржанов.

Сондай-ақ, ағымдағы жылға топырақты сақтау және олардың жай-күйін жақсарту жөніндегі жұмысты жалғастыру жоспарлануда. Атап айтқанда, климаттың өзгеруіне қарсы күресте және топырақ құнарлылығын арттыруда маңызды қадам болатын көміртегі шаруашылығын дамыту жөніндегі жол картасы әзірленіп, бекітілетін болады.

Өңірлерде 2024 жылы бекітілген 2024-2030 жылдарға арналған топырақ құнарлылығын қалпына келтіру және арттыру жөніндегі Жол картасына сәйкес іс-қимыл жоспарлары қабылданатын болады. Бұл жұмыста екпін жердің деградациясымен күресуге бағытталатын болады.

"Парламентте қаралып жатқан "Топырақты қорғау туралы" заң жобасын одан әрі ілгерілету маңызды бағыт болмақ. Ол топырақты қорғау, олардың сапасы мен құнарлы қабатын сақтау мәселелерін реттеудегі негізгі құжатқа айналады", - деп атап өтті Мұрат Теміржанов.