ФАО Қазақстанның ауыл шаруашылығы министрлігіне топырақ мониторингіне арналған жабдықты тапсырды

Біріккен Ұлттар Ұйымының Азық-түлік және ауыл шаруашылығы ұйымы (ФАО) ҚР Ауыл шаруашылығы министрлігінің (Шымкент) Оңтүстік Қазақстан гидрогеологиялық-мелиорациялық экспедициясына топырақ жағдайына талдау жүргізу үшін заманауи жабдықтар жиынтығын берді. Бұл туралы ФАО өкілдігінде хабарлады.

Топырақ жағдайын талдау суармалы жерлерді агромелиорациялық тексеруді, жер асты суларының деңгейі мен тұздылығын гидрогеологиялық бақылауды, коллекторлық-дренажды сулардың ағынын гидрологиялық тексеруді, топырақ-мелиорациялық процестерді бақылауды және су мен топырақты зертханалық зерттеуді қамтиды.

Сонымен қатар, топырақ мониторингі уақыт бойынша топырақтың өзгеруін сандық және сапалық бағалауды, топырақтағы зиянды заттардың барлық түрлерінің: ауыр металдардың, радионуклидтердің, нитраттардың, пестицидтердің қалдықтарының, бейорганикалық және органикалық шыққан басқа да химиялық ластағыштардың түсуін және құрамын бақылауды қамтиды.

Зерттеулер негізінде ауыл шаруашылығы өндірушілері агромелиоративтік және су шаруашылығы іс-шараларын жоспарлау кезінде пайдалануы мүмкін суармалы жерлердің жай-күйін жақсарту бойынша ұсынымдар әзірленеді.

ФАО-ның ақпараты бойынша, жоба аясында Қазақстанда екінші жыл бойы "топырақ дәрігерлері" - білімдерімен қатар, жергілікті жерлерде топырақ талдауын жүргізу үшін арнайы жинақтар алған оқытылған мамандар жұмыс істейді. Жалпы, жоба осындай жүз жиынтықты сатып алып, оларды пилоттық аумақтардағы серіктестер арасында таратты.

"Су мен топырақтың жай-күйін үнемі бақылау табиғи ресурстарды тұрақты пайдалануға көшу және ұлттық жоспарларды әзірлеу процесінің өте маңызды құрамдас бөлігі болып табылады. Серіктестер алған жабдық бұл процеске ықпал етеді деп үміттенеміз", - деп атап өтті ФАО/ЖЭҚ "Орталық Азия мен Түркияның ауыл шаруашылығы өндірісінің құрғақшылық пен тұздануға бейім ландшафттарындағы табиғи ресурстарды кешенді басқару" жобасының аймақтық үйлестірушісі Махмуд Шаумаров.