Қазақстанда жұмыс берушілердің ауылдық жерлерде өз қызметкерлері үшін тұрғын үй салуға жұмсаған шығындарын өтеу ережесі бекітілді. Олар 15 қаңтарда күшіне енеді. Бұл туралы Өнеркәсіп және құрылыс министрлігінің баспасөз қызметі хабарлады.
"Ауылда, кентте немесе ауылдық округте жалға берілетін тұрғын үй салған жұмыс берушілер 5 млн теңгеге дейінгі мөлшерде мемлекеттік субсидиялауға сене алады. Бұл 75-тен 100 шаршы метрге дейінгі тұрғын үй құрылысының шығындарын жабады. Субсидия алу үшін жұмыс берушілер жұмыскермен бес жылға еңбек шартын жасасуы, сондай-ақ пайдалануға берілген тұрғын үйге ауыртпалықтардың болмауын қамтамасыз етуі қажет", - деп хабарлады министрлікте.
Аумағында жұмыс берушілер тұрғын үй салуды жоспарлайтын ауылдардың, кенттердің, ауылдық округтердің тізімдерін жергілікті атқарушы органдар айқындайды және бекітеді. Бұл ретте тізімге аудан орталықтарының және облыс орталықтарынан 30 километрге дейінгі қашықтықта орналасқан, моно және шағын қалалар немесе агломерациялардың, функционалдық қалалық аудандардың құрамына кіретін ауылдар, кенттер, ауылдық округтер енгізілмейді.
