Қазақстанның алты облысының фермерлері құрғақшылықтан зардап шекті

Ақмола, Павлодар, Солтүстік Қазақстан, Қарағанды облыстарындағы ұзақ аптап ыстықтың салдарынан ауыл шаруашылығы өндірушілерінің егістері құрғақшылықтан зардап шекті. Оларға сақтандыру төлемдері төлене бастады. Бұл туралы агро сақтандыру саласындағы оператор болып табылатын Аграрлық несие корпорациясында хабарлады.

Құрғақшылық фактілері Kezekte.kz сайтындағы Agroinsuerence жүйесімен спутниктік деректер негізінде автоматты түрде тіркеледі.

АНК деректері бойынша, қазіргі уақытта топырақ ылғалдылығы тапшылығы индексін сақтандырудың 53 шарты бойынша бірінші кезең бойынша төлемдерді алты өңірдің: Ақмола, Қарағанды, Қостанай, Павлодар, Солтүстік Қазақстан, Абай облыстарының фермерлері алды. Сақтандыру компаниялары оларға 1,2 млрд. теңгеден астам төледі.

Сонымен қатар, аграрлар топырақ ылғалдылығы тапшылығы индексін сақтандырудың екінші кезеңі бойынша сақтандыру жағдайының басталғаны туралы хабарлама алды. Жоғарыда аталған өңірлер бойынша төлемдер күтілуде.

Ағымдағы жылы сақтандыру компаниялары топырақ ылғалдылығының тапшылығын индекстік сақтандыру бойынша жасалған 111 шарт шеңберінде еліміздің сегіз өңірінде 236 мың гектарды қамтыды. Осы шарттар бойынша сыйлықақылар сомасы шамамен 1,5 млрд теңгені құрады, оның 300 млн теңгесін фермерлер төледі және 1,2 млрд теңгеден астамын сақтандыру сыйлықақыларын субсидиялау түріндегі мемлекеттік қолдау құрады.