QazBioPharm ұлттық холдингі мен Boehringer Ingelheim Animal Health France компаниясы Қазақстанда аусылға қарсы вакцинаны жергілікті өндіруді көздейтін ынтымақтастық, лицензия және жеткізу туралы келісім жасасты. Қол қою Астанада президенттер Қасым-Жомарт Тоқаев пен Эммануэль Макронның келіссөздерінен кейін өтті. Бұл туралы Ақорданың баспасөз қызметі хабарлады.
Келіссөздер қорытындысы бойынша өткен брифингте Франция президенті Қазақстанның әлемдегі азық-түлік қауіпсіздігін қамтамасыз етуде маңызды рөл атқаратынын атап өтті.
"Біздің компаниялар да бұған ықпал ете алатынына сенімдімін. Біз нарықтарды нығайта аламыз. Бұл бағыттағы маңызды келісімге аусылға қарсы вакциналарды өндіруді көздейтін жоба бойынша қол қойылды", - деді Эммануэль Макрон.
Қасым-Жомарт Тоқаев Boehringer Ingelheim France президенті Кристиан Вайзенмен кездесуде келісімнің іске асырылуын толығырақ талқылады. Мемлекет басшысы ветеринарлық әл-ауқат азық-түлік қауіпсіздігін қамтамасыз етуде маңызды рөл атқаратынын атап өтті.
Сондай-ақ, Қазақстан президенті елімізде биотехнологиялық кластер құру бойынша белсенді жұмыс жүргізіліп жатқанын және осы саланы дамыту үшін QazBioPharm ұлттық биофармацевтикалық холдингі құрылғанын айтты.
