Абай облысында ІҚМ генетикасын жақсартуда

Абай облысында ІҚМ аналық басының үштен бірі тұқымдық түрлендірумен қамтылған. Бұл жұмыс ауыл шаруашылығының жалпы өнімінің көлемін екі есеге ұлғайту жөніндегі Жол картасының бағыттарының бірі болып табылады, деп хабарлады Ауыл шаруашылығы басқармасы.

"10 шілдедегі жағдай бойынша Абай облысында тұқымдық түрлендіруге 92,4 мың бас аналық ІҚМ (бұл барлық тауарлық аналық мал басының 33,9% құрайды) және 3 425 асыл тұқымды бұқа қатысады. Аталған бағдарлама аясында облыстың ауыл шаруашылығы өндірушілері қарқынды жұмыс жүргізуде", - деп хабарлады АШ-да.

Атап айтқанда, Жарма ауданындағы "Кезенсу" ӘКК-де асыл тұқымды мал өсіру 2020 жылдан бері жүргізіліп келеді. Бүгінгі таңда кооператив мүшелерінің саны 100-ден асты, аналық мал саны 1 529 басты құрады.

"Кезенсу" ӘКК етті бағыттағы асыл тұқымды бұқаларды пайдалана отырып, тұқымдық түрлендіру бойынша жұмыс жүргізеді. Тұқымдық түрлендіру нәтижесінде алынған жас малдың салмақтық үлесінің 15-20 кг - ға дейін өсуі байқалады", - деп атап өтті басқармада.

Бұдан басқа, өңірде "Шалабай" ЖШС базасында асыл тұқымды бұқалардың ұрығын алу және консервациялау бойынша зертхана ашу жоспарлануда. Зертхананың қуаты жылына 220 мың доза сперматозоидты құрайды.