Итальяндық компания Қазақстанда астық өңдеуді жоспарлап отыр

Итальяндық Bonifiche Ferraresi ауыл шаруашылығы холдингі Қазақстанда дәнді дақылдарды өсіру және қайта өңдеу бойынша жобаларды іске асыруды жоспарлап отыр. ҚР Президенті Қасым-Жомарт Тоқаев компанияның бас атқарушы директоры Федерико Веккьонимен болашақтағы ынтымақтастықты талқылады. Бұл туралы Ақорданың баспасөз қызметі хабарлады.

Қасым-Жомарт Тоқаев біздің еліміз бидай өсіру бойынша көшбасшылардың қатарына кіретінін атап өтті. Қазақстан Италияға бидайдың негізгі жеткізушілерінің бірі болып табылады және сонымен бірге ел ішінде астық өңдеу үлесін арттыруды жоспарлап отыр.

Өз кезегінде Федерико Веккьони компанияның итальяндық технологияларды пайдалана отырып, дәнді дақылдарды өсіру және Қазақстанда одан әрі терең өңдеу, сондай-ақ мамандар даярлау және технологиялар трансферті жөніндегі жобаларды іске асыру жоспарлары туралы хабарлады. Мемлекет басшысы Үкімет тарапынан жан-жақты қолдау көрсетуге дайын екенін білдірді.

Сонымен қатар, итальяндық компанияға қарқынды бау-бақша және тұқым шаруашылығын дамыту бойынша бірлескен жобаларды іске асыру мүмкіндіктерін қарастыру ұсынылды.