Қазақстанда ауыл шаруашылығы жерлерін алып қою жалғасуда

Қазақстанда мақсаты бойынша пайдаланылмайтын не заңнаманы бұза отырып берілген ауыл шаруашылығы жерлерін мемлекеттік меншікке қайтару жалғасуда. Атап айтқанда, Қарағанды облысында жыл басынан бері 41 мың га (3 мың га егістік және 38 мың га жайылым) тәркіленді. Алматы облысында бір ғана тексеру нәтижесінде 8 мың га мемлекет меншігіне қайтарылды. Бұл туралы Жер ресурстарын басқару комитетінде хабарлады.

Қарағанды облысында 2024 жылға 130 мың га жерді мемлекетке қайтару жоспарлануда. Қазіргі уақытта мамандандырылған ауданаралық экономикалық сотта мақсаты бойынша пайдаланылмайтын 19,1 мың га жерді мәжбүрлеп алып қою жөніндегі талап-арыздар қаралуда.

Бұл ретте жерлері бос тұрған жер пайдаланушыларға жалпы сомасы 586 мың теңгеге айыппұл салынды. Бұдан басқа, мемлекеттік кірістер департаментіне олардан салықты 20 есеге ұлғайту бойынша ақпарат ұсынылды.

Қазіргі уақытта Жер ресурстарын басқару жөніндегі департаментінің бақылауында 31 жер пайдаланушы бар. Оларға 60,1 мың га игеру жөнінде нұсқама берілді.

Алматы облысына келетін болсақ, тексеру барысында әкімдіктің бұрынғы қызметкері ҚР Жер кодексінің нормаларын бұза отырып, өзінің үлестес тұлғаларына 8 мың га жайылым бөлгені анықталды: Жамбыл ауданында 6 мың га және Балқаш ауданында 2 мың га.

"Департаменттің талап арызына сәйкес Алматы облысының мамандандырылған ауданаралық экономикалық сотының шешімімен жер учаскесін уақытша өтеулі жер пайдалану туралы үлгілік шарттар жарамсыз деп танылды, жоғарыда аталған жер учаскелері мемлекеттік меншікке қайтарылды", - деп хабарлады Комитетте.