ҚАҚ ауыл шаруашылығы техникасының лизингі бойынша өтінімдерді қабылдауды қайта бастауда

ҚазАгроҚаржы 24 шілдеден бастап "Қазақстанда жасалған" бағдарламасы бойынша ауыл шаруашылығы техникасының лизингін қаржыландыруға өтінімдерді қабылдауды қайта бастайды. Бұл туралы ҚАҚ-тың баспасөз қызметі хабарлады.

Ағымдағы жылы осы бағдарламаны іске асыруға 15 млрд теңге бөлінді. Бірақ кейбір клиенттер бұрын берілген өтінімдер бойынша құжаттарды ұсынбағандықтан немесе өтінім беру кезінде дұрыс емес деректерді енгізгендіктен, 7 млрд теңге көлемінде қаражаттың бос қалдығы қалыптасты. Осыған байланысты ҚАҚ отандық өндірістің/құрастырудың ауыл шаруашылығы техникасын лизингке қаржыландыруға өтінімдерді қабылдауды қайта бастайды.

Лизингті қаржыландыру мынадай шарттармен жүзеге асырылады:

• лизинг нысанасы: отандық өндірістің/құрастырудың аспалы, тіркемелі және өздігінен жүретін ауыл шаруашылығы техникасы;
• мөлшерлеме - жылдық 6% ;
• лизинг мерзімі - 10 жылға дейін;
• аванс - лизинг нысанасы құнының 15% бастап;
• қамтамасыз ету - қажет емес;
• қаржыландыру лимиті - 120 млн теңгеден аспайды және лизинг заттарының екі бірлігінен аспайды.

KazAgroFinance.bot-қа өтінім бергеннен кейін клиентке бес жұмыс күні ішінде ҚазАгроҚаржы филиалына құжаттардың толық пакетін ұсыну қажет.

Сондай-ақ, ҚАҚ мал шаруашылығының жемшөп базасына қажеттілігін қамтамасыз етуге, ауыл шаруашылығы жануарларының өнімділігі мен мал шаруашылығы өнімі көлемінің өсуін ұлғайтуға және әлеуметтік маңызы бар тамақ өнімдерін (көкөністер, жемістер, жидектер, қант қызылшасы) өндірушілерді жеңілдікпен қаржыландыруға бағытталған "ӨЗ ЖЕМШӨБІМІЗ" және "ЖАСЫЛ ӨНІМ" бағдарламасы бойынша жылдық 6% - бен қаржыландыруға өтінімдерді қабылдауды жалғастыруда.