Ағымдағы жылы Ауыл шаруашылығы министрлігі субсидиялау тетіктерін жетілдіру бойынша үлкен жұмыс жүргізді. Мәжілістің Аграрлық мәселелер жөніндегі комитетінің отырысындағы өзгерістер туралы ауыл шаруашылығы министрі Айдарбек Сапаров айтып берді.
Ауыл шаруашылығы министрлігінің баспасөз қызметінен хабарлағандай, өсімдік шаруашылығында мемлекет басшысының минералды тыңайтқыштарды енгізу көлемін ұлғайту жөніндегі тапсырмасын орындау үшін 2024 жылғы наурыздан бастап отандық тыңайтқыштарды аванстық субсидиялау тетігі енгізілді.
"Бұл субсидиялаудың жаңа ынталандырушы тетігі, онда аграрлар алдын ала арзандатылған отандық тыңайтқыштармен қамтамасыз етіледі. Осы тетік шеңберінде субсидиялар нормасы 50% - дан 60% - ға дейін ұлғайды", - деп түсіндірді АШМ-де.
Су беру жөніндегі қызметтердің құнын субсидиялау қағидаларына енгізілген өзгерістер субсидияларды тікелей су берушілерге, ауыспалы өтінімдер тетігі арқылы төлеу жолымен шығындарды өтеуді көздейді. Нәтижесінде тауар өндірушілер келіп түсетін субсидияларды күтпей және субсидияларды алғаннан кейін су берушілерге айырманы төлемей, арзандатылған құны бойынша суармалы су беру жөніндегі қызметтерді сатып алатын болады.
Айдарбек Сапаровтың айтуынша, несиелер бойынша сыйақы мөлшерлемелерін субсидиялау қағидаларына екі жаңа тетік енгізілді: егіс және егін жинау жұмыстарын жүргізуге АӨК субъектілерінің қарыз шарттары бойынша жеке субсидиялау, қаржы институттарын тікелей субсидиялау. Осылайша, көктемгі егіс және егін жинау жұмыстарын жүргізуге "таза" жылдық 5% жеңілдікті мөлшерлеме бойынша несиелер беру қамтамасыз етілді.
Көктемгі дала жұмыстарын несиелеу кезінде кепілмен қамтамасыз етудің жеткіліксіздігі проблемасын шешу үшін аграрлар үшін қарыз шарты сомасының 85% қарыздарға кепілдік беру тетігі көзделген, дала жұмыстарын жүргізуге арналған несиелік шарттар бойынша портфельдік кепілдік беру енгізілді.
"Ағымдағы жылдан бастап министрлік субсидиялар алуға қарыз алушылар тарапынан құжаттарды тапсыру қажеттілігінсіз АӨК субъектілеріне жылдық "таза" 5% сыйақы мөлшерлемесі бойынша несие беру үшін қаржы институттарының сыйақы мөлшерлемелерін тікелей субсидиялау тетігін енгізді. Арзандату ағымдағы жылғы қаржы институтына несие берудің жалпы көлеміне аванстық төлеммен жүргізілетін болады. Бүгінгі таңда бұл тетік АӨК саласындағы даму институттары үшін – "Аграрлық несиелік корпорация" АҚ, "ҚазАгроҚаржы" АҚ, "Даму Банкі" АҚ үшін қолжетімді. 2026 жылдан бастап еліміздің барлық қаржы институттарына таратылады. Бұл тетік тауар өндірушілерге бірден арзандатылған несиені субсидиялау және алу процесін жеңілдетуге мүмкіндік береді", - деп хабарлады АШМ-де.
Жалпы, Айдарбек Сапаров бес жыл ішінде аграрлық саланы субсидиялау 1,9 есеге өсіп, ағымдағы жылы 456,4 млрд теңгені құрағанын атап өтті. Бұл осы кезеңде ауыл шаруашылығының жалпы өнімінің көлемін 1,9 есеге ұлғайтуға және 8,7 трлн теңгеге дейін жеткізуге мүмкіндік берді. Осы кезең ішінде азық-түлік өндірісі екі есеге ұлғайып, 3,1 трлн теңгені құрады.
