Қазақстан астық пен майлы дақылдарды Қытайға экспорттау туралы уағдаласты

Ауыл шаруашылығы министрі Айдарбек Сапаров және China Grain Reserves Group Ltd. қытай мемлекеттік кәсіпорнының басқарма төрағасы Дэн Иу ҚХР-ға қазақстандық дәнді және майлы дақылдарды экспорттау туралы келісті. Құрамына CITIC Construction және Қытайдың ауыл шаруашылығы халықаралық алмасулар қауымдастығының өкілдері кіретін ҚХР делегациясы еліміздің әлеуетімен танысу мақсатында Қазақстанға келді. Бұл туралы ҚР Ауыл шаруашылығы министрлігінің баспасөз қызметі хабарлады.

"Ағымдағы жылы аграрлар барлық агротехнологияларды сақтай алуына ықпалын тигізген мемлекеттік қолдау шараларының нәтижесінде және қолайлы ауа райы ның арқасында біз дәнді дақылдардың жоғары өнімін алдық. 26 миллион тоннаға жуық сапалы астық бастырылды. Біз 3 млн тонна майлы дақыл жинауды жоспарлап отырмыз", - деді кездесуде Айдарбек Сапаров.

Ол Қазақстанда ҚХР-ға астық экспортының көлемін 2 млн тоннаға дейін жеткізу үшін шаралар қабылданып жатқанын атап өтті. Алайда, Қазақстан жыл сайынғы жеткізілім көлемін 3-4 млн тоннаға дейін арттыруға дайын.

Өз кезегінде Дэн Иу қытайлық сатып алушыларды майлы дақылдардың экспорттық мүмкіндіктері де қызықтыратынын хабарлады. China Grain Reserves Group Ltd. жыл сайын 100 млн тонна майлы дақыл сатып алады және Қазақстаннан жеткізу саласындағы ынтымақтастық мүмкіндігі қарастырылуда.