Қазақстан Қытайға 2 млн тоннадан астам астық экспорттауды жоспарлап отыр
ҚТЖ компаниясы жаңа егіннің астығын тасымалдауды ұйымдастыру үшін өңірлердегі және орталық деңгейдегі астық штабтарының жұмысын күшейтуде. Атап айтқанда, 2024 жылы Қытайға 2 млн тоннадан астам астық жүктерін жеткізу жоспарлануда. Бұл туралы Ұлттық компанияның баспасөз қызметі хабарлады.
Қазақстандық дәнді дақылдарды өткізудің дәстүрлі нарықтары Орта Азия, Ауғанстан және Иран елдері болып табылатынына қарамастан, соңғы жылдары қытайлық жүк алушылардың қазақстандық астық пен ұнтақтау өнімдеріне сұранысы артып келеді.
"2023-2024 жылғы маусымда ҚХР-ға астық экспорты алдыңғы маусыммен салыстырғанда 21%-ға, ұнтақтау өнімдері 24%-ға өсті. ҚТЖ бірінші жартыжылдығында 757 мың тонна астық жөнелтілді", - деп хабарлады ҚТЖ-да.
ҚР мен ҚХР темір жолдары арасындағы екіжақты ынтымақтастық шеңберінде Алашанькоу станциясының бонд аймағында түсіруді қамтамасыз ету үшін "бір жөнелтуші - бір алушы" қағидаты бойынша маршруттық жөнелтілімдерді ұйымдастыру туралы уағдаластыққа қол жеткізілді. Осы станция бағытында маусым айында астық тасымалдаушылар мен астық жүктері бар жабық вагондарды қабылдау басталды.
Бұдан басқа, жаңа егіннің астығын тасымалдауға дайындық шеңберінде Қостанай-Галаба, Көкшетау-Галаба, Қостанай-Ташкент торабы тікелей құрама пойыздарын қалыптастыру үшін кестелер тізбегі әзірленетін болады.
