Қазақстан Египетке бидай жеткізуді ұсынды

Қазақстан Египетке 1 млн тоннаға дейін астық жеткізуге дайын. Бұл туралы Ауыл шаруашылығы министрі Айдарбек Сапаров Египеттің ҚР-дағы төтенше және өкілетті елшісі Хассан Ибтиссам Ракха Ахмедпен кездесуде мәлімдеді, деп хабарлады Ауыл шаруашылығы министрлігінің баспасөз қызметі.

"Египетпен жалпы тауар айналымындағы АӨК өнімдерінің үлесі төмен, ауыл шаруашылығы өнімдерін өзара тиімді жеткізу көлемін ұлғайту әлеуеті толық көлемде пайдаланылмайды. Біз жұмысты күшейтуіміз керек. 2024 жылы қабылданған шаралар мен агротехнологияларды сақтаудың арқасында дәнді дақылдардың рекордтық өнімі жиналды. Біз Египетке 1 млн тоннаға дейін астық экспорттауға дайынбыз, ал қажет болған жағдайда жеткізу көлемін ұлғайтуға дайынбыз", - деді Айдарбек Сапаров.

Хассан Ибтиссам Ракха Ахмед бұл мәселені пысықтау үшін Қазақстанға жақын арада "Египеттің болашағы тұрақты даму үшін" агенттігінің өкілдері келетінін хабарлады. Қазақстандық тарап олардың жұмысына жан-жақты көмек көрсетуге дайын.

Сондай-ақ, кездесуде Египетке сиыр мен қой етін экспорттау, бидай мен дәнді дақылдарды сақтауға арналған қойма үй-жайларын бірлесіп салу мәселелері қаралды.