Қазақстан ауыл шаруашылығы министрлігі мал шаруашылығы өнімдерін экспорттау үшін базарларды ашу жұмыстары туралы айтты. Соңғы екі жыл ішінде Ресей, Қытай, Беларусь және Түркияның уәкілетті органдарымен белсенді жұмыс жасалды.
Нәтижесінде ағымдағы жылдың қаңтар айында Ресей Қазақстанның оңтүстік-шығыс облыстарынан аусыл бойынша шектеулерді алып тастады. Ақпан айында Қытай оңтүстік-шығыс облыстардан аусыл және ҚР түкпір-түкпірінен құс тұмауы бойынша шектеулерді алып тастады. Түркия маусым айында ҚР барлық аумағынан аусыл, құс тұмауы және нодулярлы дерматит бойынша шектеулерді алып тастады. Беларусь қыркүйек айында оңтүстік-шығыс облыстардан аусыл және ҚР түкпір-түкпірінен құс тұмауы бойынша шектеулерді алып тастады.
"Бұл шектеулерді алып тастау ет пен ет өнімдерін Қытай, Беларусь және Ресей нарықтарына экспорттауды ішінара қалпына келтіруге, сондай - ақ мал шаруашылығы өнімдерін Түркияға экспорттау үшін ветеринариялық талаптарды келісу процесін қайта бастауға мүмкіндік берді", - деп хабарлады АШМ баспасөз қызметі.
Сонымен қатар, 2024 жылы Қазақстан Әзірбайжанмен (тірі түйелер, сүт және сүт өнімдері, құс еті және оның қосалқы өнімдері), Марокко Корольдігімен (жануарларды азықтандыруға арналған өсімдік тектес өңделмеген тамақ өнімдері), Моңғолиямен (тірі ұсақ мал) экспортқа ветеринариялық сертификаттардың талаптары мен нысандарын келісті.
Экспортталатын өнім ассортиментін кеңейту жұмыстары Жапониямен (тірі жылқылар, бие және құрғақ сүт), Малайзиямен (түйе сүті ұнтағы), Иранмен (термиялық өңдеуден өткен ет өнімдері), Иракпен (ет және ет өнімдері), ЕО елдерімен (бал, аквашаруашылығы және жылқы еті), Грузиямен (тірі ірі және ұсақ мал), Әзірбайжанмен (балық), БАӘ (жылқы еті) және басқалармен жалғасуда.
Экспорттың ең перспективалы нарықтарының бірі Қытай. АШМ мал терісі, құс еті, құрғақ бие сүті, жылқы еті, жоғары термиялық өңдеуден өткен ет өнімдері, қосалқы өнімдер және т.б. түрлері бойынша ветеринариялық талаптар мен екіжақты хаттамаларды келісе отырып, ҚХР-ға экспортталатын өнім номенклатурасын ұлғайту бойынша жұмысты жалғастыруда.
