Қазақстан Франциядағы мал шаруашылығы Саммитінің құрметті қонағы болады

33-ші мал шаруашылығы саммиті 2024 жылдың 1-4 қазаны аралығында Францияның Клермон-Ферран қаласында өтеді. Қазақстан осы Саммиттің құрметті қонағы болады. Бұл туралы ҚР Ауыл шаруашылығы министрлігінің баспасөз қызметі хабарлады.

АШМ атап өткендей, ауқымды іс-шара өз алаңында ауыл шаруашылығы техникасын, жабдықтарды, мал шаруашылығы мен жануарларды күтуге арналған тауарларды, биоэнергетиканы өндірушілерді жинайды.

"Еліміздің халықаралық көрмеге қатысуы озық әзірлемелермен танысу, жетекші компаниялармен ынтымақтастықты кеңейту, сондай-ақ жаңа байланыстар орнату үшін бірегей мүмкіндік болып табылады", - деп атап өтті баспасөз қызметінде.

Ауқымды іс-шараға 1650 экспонент қатысады. Мұнда 70 тұқымның 2 мың жануарлары ұсынылады.

Халықаралық форум бағдарламасына 400 жануар арасындағы Салерс ірі қара етінің ұлттық байқауы, үш елден 56 жануар арасындағы Симментал ірі қара малының еуропалық сүт тұқымының байқауы, "Алтын Саммит" инновациялар байқауы, "Алтын Фермер" фермерлік өнімдер байқауы кіреді. Сондай-ақ, мұнда агроөнеркәсіптің өзекті мәселелеріне арналған 130-дан астам конференция өтеді.

Саммитке әлемнің 35 елінен 300-ге жуық компания және жалпы 120 мыңнан астам адам қатысады деп күтілуде. Көрме павильондарының жалпы ауданы шамамен 97 мың шаршы метрді құрайды.