Қазақстан ауыл шаруашылығы өнімдерінің Қытайға экспортын екі есеге арттырды

Қазақстаннан Қытайға ауыл шаруашылығы тауарларының экспорты ағымдағы жылы (қаңтар-тамыз) екі есеге ұлғайып, $653,3 млн құрады. Импорт 1,8% - ға өсіп, $145,6 млн құрады. Өзара сауданы одан әрі ұлғайтуды ҚР Ауыл шаруашылығы министрі Айдарбек Сапаров пен ҚХР делегациясы талқылады. Оның құрамына Сиань қалалық партия комитетінің хатшысы Фанг Хунвэй және "Сиань Ай Цзю" нан және май өнеркәсіптік корпорациясының бас директоры Цзя Хэй кірді. Бұл туралы ҚР АШМ баспасөз қызметі хабарлады.

"Экспорттың негізгі ауыл шаруашылығы тауарлары: зығыр тұқымдары, бидай, арпа, күнбағыс майы, күнбағыс тұқымдары, дәнді немесе бұршақ дақылдарын қайта өңдеу қалдықтары, басқа да майлы дақылдардың тұқымдары мен жемістері, күнжара майы, жануарларды азықтандыруға арналған өнімдер және темекі шикізаты болып табылады", - деді Айдарбек Сапаров.

Бұл ретте ол ҚХР-да қазақстандық астықты жыл сайын тұтынудың өсу үрдісін атап өтті.

Қараша айының басында Қазақстанға ҚХР Бас кеден басқармасының сарапшылары келеді. Олар ветеринарлық жүйеге аудит жүргізеді және мал өнімдерін экспорттауға мүдделі кәсіпорындарды тексереді. Қытай тарапы инспекция кезінде өндірістің толық тізбегін – ауыл шаруашылығы жануарларын ұстаудан бастап өнімді экспортқа жөнелту пунктіне дейін бағалауды жоспарлап отыр. Оң тексеруден өткен жағдайда Қазақстаннан аусыл және құс тұмауы бойынша шектеулер алынып тасталады. Бұл Қытайға мал шаруашылығы өнімдерінің экспортын ұлғайтуға мүмкіндік береді.

АШМ деректері бойынша, Қазақстан Қытаймен бидай, зығыр тұқымы, арпа, жоңышқа, жүгері, бидай кебегі мен жемді қоса алғанда, өсімдік және мал шаруашылығы өнімдерінің 24 түрін экспорттау жөніндегі хаттамаларға қол қойды. Қытайға агроөнеркәсіптік кешен өнімдерінің тағы 12 түрін: картоп, тері, бие сүті, құс еті және құс өнімдері, жылқы еті, салқындатылған сиыр еті, қой еті мен шошқа еті, сондай-ақ тірі ІҚМ экспортына қойылатын ветеринариялық және фитосанитариялық талаптарды келісу мүмкіндігі пысықталуда.

ҚР президентінің ҚХР-ға сапары шеңберінде 2023 жылғы 17-18 мамырда тұқым экспортына, бұршақ пен жасымықтың экспорттық партияларына карантиндік және фитосанитариялық талаптар бойынша, су өнімінің экспорты бойынша санитариялық және фитосанитариялық талаптар хаттамаларына қол қойылды.