Қазақстан пияз экспортын қайта бастады

Қазақстаннан пияз экспортына тыйым салу квотаға ауыстырылды. Бұл туралы Ауыл шаруашылығы министрлігінің баспасөз қызметі хабарлады.

Қазақстан аумағынан пиязды әкетуге тыйым салу ауыл шаруашылығы министрінің бұйрығымен 8 сәуірден бастап тоқтатылды.

"8-28 сәуір аралығында бұйрықпен республика аумағынан Еуразиялық экономикалық одақтың үшінші елдері мен мемлекеттеріне 20 мың тонна мөлшерінде пиязды әкетуге сандық шектеулер (квоталар) енгізілді. Квотаның бүкіл қолданылу мерзіміне тауарларды әкетуге бір өтініш беруші үшін рұқсат етілген лимит белгіленеді, ол жиынтығында 500 тоннадан аспайды", - деп хабарлады Ауыл шаруашылығы министрлігі.

Қазақстан аумағынан пиязды әкетуге арналған квоталар көлемін бөлу фитосанитариялық сертификаттар беру кезінде БАБЖ АЖ-да автоматты түрде жүзеге асырылады.

Айта кетейік, пиязды Қазақстаннан әкетуге тыйым қаңтар айының соңынан бері қолданылып келеді. Ауыл шаруашылығы өндірушілері үкіметке экспортты ашу туралы өтініш білдірді, әйтпесе егіннің бір бөлігі қоймаларда шіріп кетеді, өйткені ол республика ішінде сатылмайды.