Қазақстан Клермон-Ферранда өтіп жатқан Франциядағы 33-ші мал шаруашылығы саммитінің құрметті қонағы болды. Бұл Еуропадағы ең ірі халықаралық мамандандырылған кәсіби мал көрмелерінің бірі. Іс-шара аясында "Қазақстанның мал шаруашылығы секторындағы сын-қатерлер мен мүмкіндіктер" атты конференция өтті, деп хабарлады Ауыл шаруашылығы министрлігінің баспасөз қызметі.
Қазақстандық бизнес өкілдері отандық ІҚМ, ҰММ, жылқы тұқымдарын таныстырды. Француз жағы ең жаңа әзірлемелер мен ақпараттық технологияларды ұсынды. Қатысушылар басым бағыттардағы, оның ішінде аграрлық ғылымды дамытудағы ынтымақтастық мүмкіндіктерін талқылады, деп атап өтті АШМ-де.
Әулиекөл тұқымы жөніндегі республикалық палата мен Францияның Шароле тұқымының Ұлттық қауымдастығы, Elite Export және France Group Consulting Bureau арасындағы конференция қорытындысы бойынша асыл тұқымды істер саласындағы ниеттер туралы меморандумға қол қойылды.
Сондай-ақ, "Қайып Ата" және PEGASE BVS компаниялары жылқы етін жеткізуді ұйымдастыру бойынша ынтымақтастық туралы келісім жасасты.
"Жыл сайын біз шамамен $20 млрд сомасына ауыл шаруашылығы өнімдерін өндіреміз, ал қайта өңдеу өнімдері – $6 млрд. Азық-түлік қауіпсіздігі азық-түліктің барлық негізгі түрлері бойынша қамтамасыз етілген. Бұл ретте АӨК еңбек өнімділігінің орташа жылдық өсу қарқыны 20% құрайды. АӨК өнімдерінің жыл сайынғы экспорты $5 млрд-тан асады. Біздің мақсатымыз алдағы бес жылда оны $10 млрд-қа дейін жеткізу", - деді конференцияда ауыл шаруашылығы вице-министрі Аманғали Бердалин.
Ол Қазақстанның тікелей шетелдік инвестицияларды тартуға және ауыл шаруашылығы саласында бірлескен өндірістер құруға мүдделілігін білдірді.
33-ші мал шаруашылығы саммиті 90 елден барлығы 100 мыңнан астам адамнан тұратын ауыл шаруашылығы техникасын, жабдықтарын, мал шаруашылығы мен жануарларды күтуге арналған тауарларды, биоэнергетиканы өндірушілердің басын қосты.
Қазақстан саммитте 30 қазақстандық компанияның 70-тен астам өнім атауын көрсете отырып, елдік стенд ұсынды. Стендке келушілер елдің ауылшаруашылық өнімдерінің алуан түрлерімен танысып, оның дәмін тата алды.
