Қазақстандық маталарды Louis Vuitton мен Gucci-ге жеткізуді жоспарлап отыр

Түркістандағы Turan арнайы экономикалық аймағында мақта агроөнеркәсіптік кешенінің құрылысы басталды, онда мақтаны терең өңдеу және дайын өнімнің экспорты жолға қойылады. Бұл туралы Түркістан облысы әкімінің баспасөз қызметі хабарлады.

Жобаның құны 146,8 млрд теңгені құрайды. Толық циклді тоқыма фабрикасының құрамына 11 цех кіреді - иіру, мата өндіру, бояу, өңдеу. 2000-нан астам жұмыс орны құрылады.

Жоспар жылына 13 мың тонна иірілген жіп, 50 миллион метр үй тоқыма бұйымдары, 7 миллион төсек-орын жиынтығын өндіруді көздейді. Өндіріс қуаты жыл сайын артатын болады.

"Мақта жіп кластерін дамытуға бағытталған өндірістік кешеннің құрылысын Xinjiang Lihua (Group) Co., LTD компаниясы жүргізеді. Ол Louis Vuitton және Gucci сияқты әлемге әйгілі брендтермен тікелей жұмыс істейді. Болашақта made in Turkestan тігін жіптері мен маталары осы алып брендтерге сатылатын болады", - деп атап өтті әкімдікте.

Түркістан облысында 2023 жылы мақта шаруашылығын дамытудың және мақта-тоқыма кластерін қолдаудың 2027 жылға дейінгі Өңірлік жол картасы бекітілді. Құжатқа сәйкес төрт бағыт бойынша ауқымды жұмыс жүргізілетін болады: егістерді әртараптандыру, тұқымдармен қамтамасыз ету, жаңа технологияларды енгізу, мақта кластерін құру. 2027 жылға дейін тоғыз мақта кластерін құру жоспарлануда, бұл мақта бағасына тәуелділікті жоюы керек.

Түркістан облысында жыл сайын 100 мың га мақта егіліп, 300 мың тоннадан астам өнім жиналады. Дақылдарды әртараптандыру үшін жаңа технологиялар есебінен өнімділікті арттыруға басымдық беріледі. Биылғы жылы Арыс қаласында, Жетісай, Сауран және Ордабасы аудандарында 2,5 гектарға қытай тәжірибесі бойынша мақтаның элиталық сұрыптары егілді. Технология суды, энергияны, еңбек ресурстарын және минералды тыңайтқыштарды үнемдей отырып, 60-65 ц/га алуға мүмкіндік береді. Бұл облыс бойынша орташа көрсеткіштен 2,5 есе жоғары.