Маңғыстау облысындағы "Жеті лақ" фермасы ешкі мен түйе сүтінен ірімшік өндірумен айналысады. Ферманың негізін қалаушылар - Кобзевтер отбасы - Франциядағы Мondial du Fromage-2023 халықаралық ірімшік байқауына қатысады. Бұл байқауға Қазақстаннан үміткерлер алғаш рет жіберілетін болады. Бұл туралы Маңғыстау облысы әкімінің баспасөз қызметі хабарлады.
"Жеті лақ" фермасы 2020 жылдан бастап жұмыс істейді және Түпқараған ауданында, Ақшұқыр ауылында орналасқан. Кәсіпкерлер пастерленген ешкі сүтін, йогурт, айран, сүзбе, қаймақ және әр түрлі пісетін ірімшіктердің 12 түрін шығарады.
Ай сайын Кобзевтер отбасы 3,5 тонна сүт өндіреді. Ферма 10 га жерді алып жатыр, оның төртеуі ешкі өсіруге арналған. Сондай-ақ, аумақта жемшөп қоймасы және сүт өңдеу цехы бар.
"Биыл біз 5 млн теңгеге мемлекеттік өтеусіз грантты ұтып алдық, ол біздің өндірісті дамытуға бағытталады. Сондай-ақ, біз "Ауыл аманаты" бағдарламасына қатысамыз. Ауыл шаруашылығы кәсіпорнын өз ақшасына дамыту өте қиын, мемлекет ауыл шаруашылығы өндірушілеріне көңіл бөліп, қолдау көрсетіп отырғаны қуантады. Биылғы жылы біз үшін маңызды оқиға Мondial du Fromage-2023 халықаралық ірімшіктер байқауына қатысу болып табылады, онда біз өз ірімшіктерімізді таныстырамыз", - деді ірімшік жасаушы шебер Александра Григолова.
Кәсіпорынға өңір басшысы Нұрлан Ноғаев келді. Ол Маңғыстау ірімшік өндірушілерінің үлкен әлеуетін атап өтті.
"Маңғыстауда өндірілетін қазақстандық ірімшіктер жақын арада отандық экспортты дамытудың негізгі драйвері бола алады. Сіздердің елімізді халықаралық деңгейдегі байқауда таныстыру мүмкіндігіне ие болғаныңызға қуаныштымын. Сіздерге сәттілік тілеймін және кәсіпкерлердің бастамаларын қолдауға әрқашан дайынбыз", - деп атап өтті Нұрлан Ноғаев.
Француздық Le Mondial du Fromage байқауы қыркүйек айында Тур қаласында өтеді. Бұл сүт өнімдерінің байқауы Еуропадағы кез-келген елден келген өндірушілер өз туындыларын жоғары деңгейдегі халықаралық іс-шарада ұсына алатын жалғыз алаң болып табылады.
