Қытай Қазақстаннан күнжара жеткізуге рұқсат берді

Қазақстан президенті Қасым-Жомарт Тоқаевтың Қытайға мемлекеттік сапары аясында 17 мамырда екі ел арасындағы сауда және инвестициялық ынтымақтастықты кеңейтетін келісімдер мен меморандумдарға қол қойылды. Бұл туралы Ақорданың баспасөз қызметі хабарлады.

Атап айтқанда, Қазақстан ауыл шаруашылығы министрлігі мен ҚХР Бас кеден басқармасы ҚР-дан ҚХР-ға күнбағыс, мақсары, соя және зығыр шроттарының экспорттық партияларына қойылатын санитарлық және фитосанитарлық талаптар жөніндегі хаттамаға қол қойды.

Сондай-ақ Қазақстаннан Қытайға экспортталатын бұршақ пен тағамдық жасымыққа қойылатын инспекциялық және карантиндік талаптар жөніндегі хаттамаға қол қойылды. Үшінші хаттама ҚР-дан ҚХР-ға су өнімдерін, оның ішінде балық өнімдерін экспорттауға қатысты.

Бұдан басқа, ҚР және ҚХР үкіметтері Транскаспий халықаралық көлік бағытын дамыту бойынша меморандум, сондай-ақ визалық талаптардан өзара босату туралы келісім жасасты.

С. Сейфуллин атындағы Қазақ агротехникалық университеті Қытайдың солтүстік-батыс ауыл шаруашылығы және орман шаруашылығы университетімен ынтымақтастық туралы келісімге қол қойды.

ҚХР Төрағасы Си Цзиньпинмен келіссөздер барысында Қасым-Жомарт Тоқаев Қазақстанның Қытайға ауыл шаруашылығы өнімдерінің экспортын кеңейтуге мүдделі екенін атап өтті.

"Өткен жылдың өзінде ауыл шаруашылығы өнімдерінің өзара сауда көлемі 780 млн доллардан асты. Қазақстан бұршақ дақылдарын, жоғары сапалы экологиялық таза салқындатылған сиыр, қой етін жеткізуге дайын", - деді Қазақстан президенті.

Ол өткен жылы өзара сауда көлемі 30 жылда рекордтық деңгейге жеткенін атап өтті – тауар айналымының жоғары өсу қарқынын ескере отырып, Қасым-Жомарт Тоқаев 2030 жылға қарай 40 млрд долларға жаңа деңгей белгілеуді ұсынды.