Семейде ірі ет комбинаты 2025 жылы іске қосылады

Ірі ет комбинатын Семейде 2025 жылы іске қосу жоспарлануда. Инвестор Чекоман ауылында жер телімін алған "Еуразия АгроХолдинг" компаниясы болды. Бұл туралы "Атамекен" Ұлттық кәсіпкерлер палатасында хабарлады.

Кәсіпорын өнімді экспортқа және ішкі нарыққа жеткізетін болады. Жобаның құны шамамен 9 млрд теңгені құрайды. Оны іске асырудың арқасында жұмыстың алғашқы кезеңінде 250 жұмыс орны құрылады.

"Жаңа ет комбинаты союдан бастап өнім экспортына дейінгі барлық өндіріс процесін жүзеге асыратын болады. Қуаттылығы ауысымына 200 бас ірі қара мал сою және қуаттылығы ауысымына 1400 бас ұсақ мал сою желілері бар ет комбинатына ауысымына 5 тонна шұжық цехы және ауысымына 12 тонна консерві цехы кіреді. Сондай-ақ ет комбинаты бойынша мемлекет қаржыландыратын қосымша 4 жоба іске асырылатын болады: қазандық, тазарту құрылыстары, электр беру желілері, су құбыры құрылысы", - деді Абай өңірлік кәсіпкерлер палатасының сарапшылары.

Қазіргі уақытта инженерлік-геодезиялық зерттеулер, су алу жүйесінің техникалық жай-күйін кешенді тексеру, су тартуды гидрогеологиялық тексеру жүргізілді. Сараптаманы маусым айының ортасына дейін аяқтау, ал зауытты 2025 жылға дейін толық іске қосу жоспарлануда.