Қазақстанда бұқалар мен қошқарларды әкетуге алты ай мерзімге жаңа сандық шектеулер (квоталар) енгізілуде. Тиісті бұйрық 2 ақпанда күшіне енеді, деп хабарлады ҚР АШМ баспасөз қызметі.
Ведомствода тауарлардың жекелеген түрлерін экспорттауға лицензия беру кезінде квоталарды бөлу "Е-лицензиялау" порталында автоматты түрде жүргізілетінін түсіндірді.
Өтінім беру үшін "Е-лицензиялау" порталында "ТАУАРЛАРДЫҢ ИМПОРТЫ, ЭКСПОРТЫ" санатын, содан кейін "Қызметті лицензиялау" - "Сандық шектеулер (квоталар) енгізілген кезде тауарлардың жекелеген түрлерінің экспортына және (немесе) импортына лицензия беру" қызметін таңдау қажет. Бұдан әрі - "Сандық шектеулер (квоталар) енгізілген кезде тауарлардың жекелеген түрлерін экспорттауға лицензия беру" кіші қызметі.
Өтініш беру үшін келесі құжаттар талап етіледі: сыртқы сауда шартының (келісімшарттың), оған қосымшаның және (немесе) толықтырудың электрондық көшірмесі, ал сыртқы сауда шарты (келісімшарт) болмаған жағдайда – тараптардың ниетін растайтын өзге де құжаттың электрондық көшірмесі.
Бұқалар мен қойларды экспорттауға лицензия алуға өтінімді 2 ақпаннан бастап беруге болады. Туындаған мәселелер бойынша ҚР АШМ агроазық-түлік нарықтары және ауыл шаруашылығы өнімдерін қайта өңдеу департаментінің сыртқы сауда басқармасына 555-416 нөмірі бойынша хабарласуға болады.
Естеріңізге сала кетейік, 12 айдан асқан бұқашықтарды әкетуге квоталар 60 мың бас көлемінде (бордақылау алаңдары мен тауар өндірушілер үшін 30 мың бастан), 6 айдан асқан қошқарларды әкетуге – 120 мың бас (бордақылау алаңдары үшін 30 мың, тауар өндірушілер үшін 90 мың бас) белгіленді. Бір бордақылау алаңынан 4 мыңға дейін бұқа, 1 мыңға дейін қой шығаруға рұқсат етіледі. Бір тауар өндірушіге лимит - 500 бұқаға дейін, 500 қойға дейін.
