Таразда 19-21 наурыз аралығында KazAgro Zhambyl Бірінші халықаралық форум-көрмесі және Түркі мемлекеттері ұйымының (ТМҰ) ауыл шаруашылығы министрлерінің кездесуі өтеді. Бұл туралы АШМ баспасөз қызметі хабарлады.
Іс-шаралар бағдарламасы ТМҰ ауыл шаруашылығы министрлерінің кездесуін, ТМҰ ауыл шаруашылығы саласындағы ынтымақтастық жөніндегі жұмыс тобының төртінші отырысын, 3-ші Түркі Агро Форумын және В2В компаниялармен кездесулерді, ЕСОЅА тұқым конгресін, тұқым шаруашылығы форумын және әртүрлі екіжақты кездесулерді қамтиды.
Өз кезегінде KazAgro Zhambyl көрмесі аясында Наурызды ауқымды тойлау өтеді. Көрмеге 5 мыңнан астам келуші – Түркі Мемлекеттері Ұйымының ауыл шаруашылығы министрлері, Қазақстан мен шет елдердің АӨК саласының өкілдері қатысады деп күтілуде. Көрменің ұйымдастырушылары Жамбыл облысының әкімдігі және ExpoGroup Халықаралық көрме компаниясы болып табылады.
KazAgro Zhambyl-дің негізгі қатысушылары - Тұқым өндірушілер ынтымақтастығы елдерінің Экономикалық Қауымдастығы (ECOSA) және Өнеркәсіпшілер мен тұқым өндірушілер қауымдастығы (TSÜAB). Көрмеге келушілер үшін Қытайдан келген өндірістік компаниялардың өкілдерінен экспозициялар дайындалды.
