Күрішті жаппай жинау Қызылорда облысында басталды

Қызылорда облысында Дала күні өтті, сонымен қоса өңірде күрішті жаппай жинау басталды. Сондай-ақ, іс-шараға қатысушылар агросектордағы соңғы әзірлемелерді, селекциялық жетістіктерді және жаңа ауыл шаруашылығы техникасын көрсетті. Жыл сайын бұл Дала күні 1000-нан астам ауыл шаруашылығы өндірушілерін біріктіреді. Бұл туралы Ауыл шаруашылығы министрлігінің баспасөз қызметі хабарлады.

Биыл Қызылорда облысы аграрлық саланы дамытудың оң серпінін сақтап қалды. Биыл өңірде 89 мың га күріш егілді. Егін жинау жұмыстары кесте бойынша жүргізілуде, оларды қазан айының ортасына дейін аяқтау жоспарлануда.

Ауыл шаруашылығы министрлігі өз тарапынан күріш шаруашылығына барлық қолдау көрсетеді. Атап айтқанда, фермерлерге арзандатылған минералды тыңайтқыштар мен пестицидтер сатылады. Су беру бойынша қызметтер жеңілдікті құны бойынша ұсынылады. Бұдан басқа, егіс және егін жинау жұмыстарын жүргізу несиеленуде. Биыл алғаш рет Азық-түлік корпорациясы форвардтық сатып алу аясында 6 мың тонна күріш жармасына келісімшарт жасады.

Дала күніне қатысушыларды құттықтай отырып, ауыл шаруашылығы министрі Айдарбек Сапаров өңірдің ауыл шаруашылығын қаржыландыруға биыл 14 млрд теңге бағытталғанын атап өтті. Облыста "Ауыл аманаты" ауыл тұрғындарына шағын несие беру бағдарламасы кеңейіп келеді. Қызылорда облысының кемінде 600 ауыл тұрғыны жалпы сомасы 3 млрд теңгеге жеңілдетілген қарыз алады.