Тауарлар
Қызметтер
Тасымалдау қызметі
Ауыл шаруашылығы министрі болып Айдарбек Сапаров тағайындалды. Тағайындау туралы Жарлыққа ҚР Президенті қол қойып, Сапаровты Солтүстік Қазақстан облысының әкімі қызметінен босатты. Бұл туралы Ақорданың баспасөз қызметі хабарлады.
Ербол Қарашөкеев мемлекет басшысының Жарлығымен ауыл шаруашылығы министрі қызметінен босатылды.
Айдарбек Сапаров 2022 жылдың 1 желтоқсанынан бастап қазіргі уақытқа дейін Солтүстік Қазақстан облысының әкімі болды.
Сапаров 1966 жылы Солтүстік Қазақстан облысында дүниеге келген. Омбы ауыл шаруашылығы институтын, М. Қозыбаев атындағы Солтүстік Қазақстан мемлекеттік университетін зооинженер, мемлекеттік басқару бакалавры мамандығы бойынша бітірген. "Құрмет", "Парасат" ордендерімен және "Астанаға 10 жыл" мерейтойлық медалімен марапатталған.
Әр жылдары "Азық-түлік корпорациясы" АҚ Солтүстік Қазақстан облыстық өкілдігі директорының орынбасары, Солтүстік Қазақстан облысы бойынша АШМ облыстық аумақтық инспекциясының бастығы болып жұмыс істеді.
СҚО Шал ақын және Мағжан Жұмабаев аудандарының әкімі, Солтүстік Қазақстан облысы әкімінің орынбасары болды.
2019 – 2022 жылдары Қазақстан Республикасының Ауыл шаруашылығы бірінші вице-министрі болып жұмыс істеді.
