Ауыл шаруашылығы министрлігі АӨК дамытудың жаңа ұлттық жобасын әзірледі

Ауыл шаруашылығы министрлігі АӨК дамыту жөніндегі 2024-2028 жылдарға арналған "Қуатты АӨК" ұлттық жобасын әзірлеп, талқылауға ұсынды. Құжат несиелеу және субсидиялау бөлігінде саланы қаржыландыруды едәуір ұлғайтуды көздейді.

"Ұлттық жобада 5 жылға көктемгі егіс және егін жинау жұмыстарын жеңілдетілген несиелендіруге, ауыл шаруашылығы техникасының жеңілдетілген лизингіне, сондай-ақ агроөнеркәсіптік кешен саласындағы инвестициялық жобаларды іске асыруға бағытталатын 10,5 трлн теңге қайтарымды қаражат көзделген. Бұдан басқа, мемлекет басшысының АӨК-ні мемлекеттік қолдау көлемін 2 есеге ұлғайту жөніндегі тапсырмасын іске асыру мақсатында Ұлттық жобада субидиялау көлемін 2024-2028 жылдар аралығында 432,9 млрд теңгеден 882,5 млрд теңгеге дейін ұлғайту көзделген", - деп хабарлады АШМ-де.

Сондай-ақ, Ұлттық жобаның іс-шараларын іске асыру кезінде 5 жыл ішінде 3,8 трлн теңге мөлшерінде бюджеттен тыс қаражат тартылатын болады.

АШМ-де ұлттық жоба екі міндетті көздейтінін түсіндірді: егіс алқаптарының құрылымын жеделдетіп әртараптандыру және агротехнологияларды енгізуді ынталандыру, сондай-ақ АӨК-де басым инвестициялық жобаларды іске асыру.

Ұлттық жобаны іске асыру 2028 жылға қарай мынадай нәтижелерге қол жеткізуге мүмкіндік береді:

• ауыл шаруашылығының жалпы өнімінің көлемін 2028 жылы 2 есеге, 17 трлн теңгеге дейін ұлғайту;
• ауыл шаруашылығы техникасын жылына 8-10% дейін жаңарту;
• еңбек өнімділігін 2 есе, 9,1 млн теңгеге дейін арттыру;
• АӨК өнімдерінің экспортын 2 есеге, 10 млрд-қа дейін ұлғайту;
• ауыл шаруашылығына инвестициялар ағынын 3,3 есеге, 3,2 трлн теңгеге дейін ұлғайту;
• өңделген ауыл шаруашылығы өнімдерінің (сүт, ет, майлы дақылдар, күріш, жүгері, қарақұмық) үлесін 70%-ғадейін ұлғайту;
• отандық өндіріс есебінен импортқа тәуелді азық-түлік тауарлары бойынша өзін-өзі қамтамасыз ету: алма – 100%, шұжық өнімдері – 100%, ірімшік және сүзбе – 100%, қант-83%, құс еті - 100%.