АШМ жылыжай құрылысын субсидиялау нормативін ұлғайтты

Ауыл шаруашылығы министрлігі басым дақылдарды дамытуды мемлекеттік қолдау шеңберінде өсімдік шаруашылығын субсидиялау қағидаларына өзгерістер енгізді. Түзетулер маусымаралық кезеңде субсидиялар нормалары бойынша 1 гектарға шығыстарды (электр энергиясына, газға, көмірге) субсидиялауды көздейді. Сондай-ақ инвестициялық субсидиялар шеңберінде жылыжай кешендерін салу және кеңейту жөніндегі жобаларды іске асыру кезінде үлесті 25% - дан 30% - ға дейін ұлғайту бөлігінде өзгерістер енгізілді. Бұл өзгеріс 2023 жылдың 10 желтоқсанынан бастап күшіне енеді, деп хабарлады АШМ баспасөз қызметі.

Басым дақылдардың тізбесін және субсидиялау нормативтерін жергілікті атқарушы органдар бекітуі тиіс. Бүгінгі таңда Түркістан облысы мен Шымкент әкімдіктері өнеркәсіптік және фермерлік жылыжайлар үшін ағымдағы жылға арналған субсидиялардың көлемі мен нормативтерін бекітті.

Жергілікті атқарушы органдар қабылданған нормативтерді субсидиялаудың бірыңғай мемлекеттік ақпараттық жүйесінің (БМСАЖ) базасына енгізді. Өтінімдерді қабылдау 2023 жылдың 20 желтоқсанына дейін ашық.

Бюджет қаражатын тиімді жұмсау, сондай-ақ барлық агротехнологиялар сақталатын жылыжайларды қолдау үшін өндіріс технологияларына сәйкестік сертификатының (есебінің) болуы міндетті талап болып табылады. Ұлттық стандартты ҚР СИМ Техникалық реттеу және метрология комитеті АШМ және бизнес өкілдерімен бірлесіп әзірледі. Ол 2023 жылдың 1 мамырынан бастап күшіне енді.

1 желтоқсандағы жағдай бойынша 756 өтінім қабылданып, фермерлік жылыжайлар үшін 726 сертификат берілді. Жұмыста 30 өтінім бар.

Сертификат алудың барлық мәселелері бойынша ҚР СИМ Техникалық реттеу және метрология комитетіне хабарласуға болады.