АШМ аграрларға дизель отынын бөлу ережелеріне өзгерістер енгізді

ҚР Ауыл шаруашылығы министрлігі мұнай өнімдерін бөлудің өңірлік операторларын айқындау Қағидаларына және көктемгі егіс және егін жинау жұмыстары кезінде ауыл шаруашылығы өндірушілері үшін мұнай өнімдерінің көлемін қалыптастыру және бөлу қағидаларына бірқатар өзгерістер енгізді. Бұл туралы ведомствоның баспасөз қызметі хабарлады.

Ауыл шаруашылығы министрлігі 2023 жылғы егін жинау жұмыстарына жеңілдікті дизель отынын бөлу қорытындысы бойынша түскен аграрлардың ұсыныстарын ескерді. Енді көктемгі егіс және егін жинау жұмыстарын жүргізуге бөлек өтінім берудің орнына бірыңғай электрондық өтінім беру көзделген, бұл шаруалар үшін дизель отынына квота алу рәсімін оңтайландыруға және жеңілдетуге мүмкіндік береді. Сонымен қатар, фермерлердің ұсыныстарын ескере отырып, өтінім беру мерзімі 20-дан 30 күнге дейін ұзартылды.

Сондай-ақ дақылдар түрлері бойынша және бір гектарға дизель отыны шығысының бірыңғай базалық нормативтері алынып тасталды. Бұрын бұл нормативтер аймақтардың топырақ-климаттық жағдайларының ерекшеліктерін ескермеген және ауыл шаруашылығы өндірушілерінің көптеген шағымдарын тудырған.

"Ереженің жаңа редакциясында дизель отынын тұтыну нормативтері аграрлық бейіндегі ғылыми ұйымдардың ұсынысы негізінде өңірлердің топырақ-климаттық жағдайларын ескере отырып белгіленетін болады. Операторлар іске асырмаған дизель отынының қалдықтарын толық және мақсатты пайдалану үшін ережеге жеңілдетілген дизель отынының қалдықтарын пайдалануға болатын агротехникалық жұмыстардың қосымша түрлері бойынша нормалар енгізілген", - деп хабарлады АШМ-де.