Жамбыл облысындағы фермерлерге өтемақыға 3,7 млрд теңге бөлінеді

Үкімет резервінен құрғақшылықтан зардап шеккен Жамбыл облысындағы фермерлерге өтемақы төлеуге 3,7 млрд теңге бөлінеді. Бұл туралы "Ашық НҚА" порталында орналастырылған Үкімет қаулысының жобасында көрсетіледі.

"Қазақстан Республикасының Ауыл шаруашылығы министрлігіне 2023 жылға арналған республикалық бюджетте көзделген Қазақстан Республикасы Үкіметінің төтенше резервінен Жамбыл облысының әкімдігіне табиғи сипаттағы төтенше жағдай нәтижесінде агроөнеркәсіптік кешен субъектілеріне келтірілген залалды өтеуге берілетін ағымдағы нысаналы трансферттер түрінде аудару үшін 3 млрд 756 млн 300 мың 171 теңге сомасында қаражат бөлінсін", - делінген қаулы жобасында.

Қаржы министрлігіне бөлінген қаражаттың мақсатты пайдаланылуын бақылауды қамтамасыз ету тапсырылады. Қаражатты пайдалану туралы Жамбыл облысының әкімдігі Ауыл шаруашылығы министрлігіне 2023 жылғы 1 желтоқсанға дейін есеп беруі тиіс.

Бұған дейін Жамбыл облысында табиғи сипаттағы төтенше жағдай жарияланған болатын. Оның себебі нәтижесінде аймақтағы дақылдардың бір бөлігі опат болған құрғақшылық пен суармалы судың тапшылығы болды.