2024 жылы ауыл тұрғындарына шағын несие беруге 100 млрд теңге бөлінеді

ҚР Ауыл шаруашылығы министрлігі ауылдық елді мекендер мен шағын қалаларда шағын несиелеу ережелерін бекітті. Бұл мақсатқа 2024 жылы 100 млрд теңге бөлінеді, деп хабарлады ведомствоның баспасөз қызметі.

"Ауыл Аманаты" бағдарламасын іске асыруға 2024 жылы республикалық бюджеттен 100 млрд теңге сомасында қаражат бөлінді, ол 16 мыңнан астам шағын несие беруге бағытталады, бұл 17 мыңнан астам жаңа жұмыс орнын құруға мүмкіндік береді", - деп хабарлады АШМ-де.

Шағын несиелер бес жылға дейінгі мерзімге, ал мал шаруашылығы саласындағы жобаларға – жеті жылға дейін берілетін болады. Шағын несиенің ең жоғары сомасы – 2 500 айлық есептік көрсеткішке дейін, ауыл шаруашылығы кооперативтерін дамыту үшін - 8 000 айлық есептік көрсеткішке дейін. Бұрын алынған шағын несие бойынша міндеттемелерді толық орындаған үміткерлерді қайта несиелеу кезінде ең жоғары соманың мөлшері 8 000 АЕК-ке дейін ұлғаяды.

Сыйақының номиналды мөлшерлемесі жылдық 2,5% - дан аспайды; негізгі борыш пен сыйақыны өтеу бойынша жеңілдікті кезең шағын несиелеу мерзімінің ұзақтығының 1/3-нен аспайды, кепілмен қамтамасыз етудің болуы туралы талап бар.

Сонымен қатар, шағын несие алуға рұқсат алғаннан кейін салық органдарында жеке кәсіпкер ретінде тіркелу қажет.

Ауылдық елді мекендер мен шағын қалалардың жеке және заңды тұлғалары ауыл халқының табысын арттыру жөніндегі жобаны масштабтау шеңберінде шағын несиелер алуға үміткерлер болып табылады:

• жұмыссыздар;
• дара кәсіпкер ретінде мемлекеттік тіркеусіз кіріс алу мақсатында тауарларды өндіру (өткізу), жұмыстарды орындау және қызметтер көрсету жөніндегі қызметті дербес жүзеге асыратын тұлғалар және (немесе) әрекетсіз дара кәсіпкерлер;
• отбасылық кәсіпкерлікте ақы төленбейтін қызметті жүзеге асыратын тұлғалар;
• сату (айырбастау) үшін жеке қосалқы шаруашылықта өнім өндіру жөніндегі қызметті өз бетінше жүзеге асыратын, табысы ең төменгі күнкөріс деңгейінен төмен тұлғалар;
• "Ауыл шаруашылығы кооперативтері туралы" Қазақстан Республикасының Заңына сәйкес қызметін жүзеге асыратын ауыл шаруашылығы кооперативтері;
• жаңадан бастаған және жұмыс істеп тұрған жеке кәсіпкерлер.