Үкіметке ауыл шаруашылығы өнімдерін қайта өңдеуді дамытудың 2028 жылға дейінгі Кешенді жоспары бекітуге енгізілді. Құжат өңдеуді қолдаудың жаңа шараларын, жаңа нарықтарды ашуды, сондай-ақ қазақстандық өңдеушілерді қолдаудың қорғау шараларын қолдануды көздейді. Жоспарды іске асыруға 372 млрд теңге бағытталады, деп хабарлады Ауыл шаруашылығы министрлігінің баспасөз қызметі.
100 млрд теңге сомасына 65 сүт-тауар фермасын салу мен жаңғыртуды қаржыландыру жоспарланған. Бұл жылына 372 мың тонна сүт өндіруді қамтамасыз етуге мүмкіндік береді.
"Мемлекет басшысының тапсырмасы бойынша 2024 жылдан бастап бағдарлама тағы да бірқатар салаларды қамтитын болады. Енді СТФ, суару, көкөніс қоймалары мен құс фабрикаларын қаржыландырумен қатар тағы сегіз сала, оның ішінде ауыл шаруашылығы өнімдерін қайта өңдеу кәсіпорындары да қаржыландырылатын болады», - деді Мәжілісте ауыл шаруашылығы министрі Айдарбек Сапаров.
Сондай-ақ шикізаттың өзіндік құнын төмендету үшін шаралар кешені қабылданды. Атап айтқанда, жемшөпті арзандату үшін өндірісті қарқындату, дақылдарды әртараптандыру және суару шаралары жүзеге асырылуда. Ағымдағы жылы алғаш рет егіс және егін жинау жұмыстарына жеңілдікпен несие беру көлемі 580 млрд теңгені құрады. Жемшөп дақылдарының көлемі 3,4 млн гектарға дейін жеткізілді, бұл 2023 жылғы деңгейден 314 мың гектарға артық. 2026 жылға қарай жемшөп дақылдарының егіс көлемін 3,6 млн гектарға дейін жеткізу жоспарлануда.
"Азық-түлік корпорациясы арқылы фермерлерге 235 мың тонна көлемінде жеңілдетілген бағамен сату үшін тұрақты жемшөп қоры жасақталды. Бұл шаралар өңдеу өнеркәсібін жоғары сапалы, қолжетімді шикізатпен жеткілікті көлемде қамтамасыз етуге мүмкіндік береді", - деді министр.
Сондай-ақ, саланың технологиялық артта қалуын шешу, оның ішінде өнімді өткізу арналары қалыптасқан ірі жаһандық инвесторларды тарту арқылы да шаралар қарастырылған.
Министрлік мал шаруашылығы өнімдерінің экспорттық нарықтарын ашу бойынша белсенді жұмыс жүргізуде. Атап айтқанда, Қытайға тері және қосалқы өнімдер экспортын ашу бойынша келіссөздер жүргізілуде.
"Кешенді жоспар аясында ауыл шаруашылығы өнімдерін қайта өңдеуді дамытуға бес жыл ішінде 372 млрд теңгеден астам, оның ішінде инвестициялық мақсаттарға - 150 млрд теңге және айналым мақсаттарына – 222 млрд теңге бағыттау жоспарлануда", - деп хабарлады АШМ.
