Түркістандық фермерлерге субсидияға 40 млрд теңге бөлінді

Түркістан облысының АӨК субсидиялауға биыл шамамен 40 млрд теңге, ал жалпы республика бойынша - 400 млрд теңге бағытталды. Gosagro.kz жаңа субсидиялау жүйесінің жұмысы бойынша мәселелерді жедел шешу үшін Түркістан облысына ауыл шаруашылығы басқармасының фермерлері мен қызметкерлеріне оқыту жүргізген АШМ жұмыс тобы барды. Сондай-ақ, ауыл шаруашылығы министрі Ербол Қарашөкеев өңірдің ауыл шаруашылығы өндірушілерімен кездесті. Бұл туралы Ауыл шаруашылығы министрлігінің баспасөз қызметі хабарлады.

Gosagro.kz жүйесінің жұмысы туралы сұрақтарға жауап бере келе, АШМ басшысы келіп түскен барлық шағымдар мен ұсыныстар жедел түрде пысықталып, жойылатынын еске салды.

"Аймақтағы фермерлердің көпшілігі егістіктерді цифрландыру жылдамдығына алаңдайды. "Қазақстан Ғарыш Сапары" АҚ жауапты қызметкерлерімен жұмыс ұйымдастырылды. Сонымен қатар, жақын арада "алқаптардың электрондық картасын" ағымдағы жылдың соңына дейін уақытша жою туралы бұйрық бекітіледі", - деп атап өтті Ербол Қарашөкеев.

АШМ деректері бойынша Gosagro.kz-да өтінімдерді қабылдау ашылған сәттен бастап бүкіл ел бойынша жалпы сомасы 160,9 млрд теңгеге 14 016 өтінім берілді. Барлық деректер порталда еркін қолжетімділікте орналастырылған.

Сондай-ақ, Ербол Қарашөкеев осы маусымда шикі мақтаға сатып алу бағасының күрт төмендеуімен байланысты жағдайға түсініктеме берді. Ол мемлекеттің баға белгілеу мәселесіне араласуға құқығы жоқ екенін түсіндірді. Сонымен қатар, Бәсекелестікті қорғау және дамыту агенттігі мақта өңдеу зауыттарының мақта бағасын қалыптастыру бойынша тергеу жүргізуде. Сөз байласу расталған жағдайда қолданыстағы заңнама шеңберінде шаралар қабылданатын болады.

Мақта өсіруді субсидиялауға келетін болсақ, облыс әкімдігіне жергілікті бюджеттен субсидияланатын басым дақылдардың тізбесін айқындауға мүмкіндік беретін Қағидаларға өзгерістер енгізу жоспарлануда. Бұл ғылыми-зерттеу институтының қорытындысы негізінде және АШМ келісімі бойынша жасалады.

Сондай-ақ, министрліктің ерекше бақылауында жылыжай шаруашылықтарының проблемалық мәселелері тұр. Олар тұқымдарға, тыңайтқыштарға және пестицидтерге субсидия алуға құқылы. Инвестициялық субсидиялау шеңберінде жылыжай кешендерін салу және кеңейту жөніндегі жобаларды іске асыру кезінде шығындардың 25% тамшылатып суару жүйелерін құру және кеңейту кезінде 50% өтеу көзделген.

"Субсидиялаудың жаңа қағидалары қабылданғаннан кейін, егер Түркістан облысының әкімдігі жабық топырақтағы көкөністерді басым дақылдар ретінде анықтаса, онда олардың өндірісін субсидиялау мүмкіндігі пайда болады. Жылыжай көкөністерін өндірушілерге нақты қолдау көрсету үшін электр энергиясы мен газ шығындарын субсидиялау тетігі пысықталды", - деп толықтырды министр.

Ұсынылған механизмге сәйкес, субсидия алу үшін фермерлік жылыжайлар жақын арада қабылданатын өндіріс стандарттарына сәйкес келуі керек.