Шегірткелердің таралуы Ақтөбе, Қостанай және ең ауқымды – Түркістан облысында байқалады. Бұл туралы ҚР премьер-министрінің баспасөз қызметі хабарлады.
Шегірткенің таралуына қарсы іс-қимыл жөніндегі орталық жедел штаб отырысында вице-премьер Серік Жұманғарин өңірлердегі ахуал туралы баяндамаларды тыңдады.
Түркістан облысында өңделген 260 мың гектардан басқа 50 мың гектардан астам таралу учаскелері анықталды. Қосымша өңдеу Түркістан облысының Арыс қаласында, Сарыағаш, Келес, Ордабасы және Шардара аудандарында жүргізілуде.
Облыс әкімдігінің мәліметінше, өңдеу 70 бірлік жерүсті техникасының көмегімен жүргізіледі, оған қоса қосымша төрт ұшақ келді. Қазіргі уақытта барлық қажетті техника көкөніс-бақша дақылдарының айналасында шоғырланған. Бүгінгі таңда дақылдарға зиян келтірілмеді.
Ақтөбе облысының Әйтеке би ауданында шегірткелердің көбеюі басталды. Өңдеуге арналған техника дайын. Өңірде 76 бірлік техниканы пайдалана отырып, 12 ауданда 281 мың гектар жерге химиялық өңдеу жүргізілді. Шегірткенің пайда болу орындарын тексеру және анықтау үшін 600-ге жуық адам тартылды: олар фитосанитариялық инспекция, әкімдік қызметкерлері және уақытша қызметкерлер. Шегірткенің белсенді өсу кезеңінде жұмысты күшейту үшін әкімдікке тағы 14 бірлік техника қажет.
Қостанай облысында бес ауданда 29,4 мың га аумақта химиялық өңдеу жүргізілді. Туу орындарын мониторингтеу және анықтау үшін 129 зерттеуші және 326 уақытша қызметкер тартылды. 72 техника дайын. Шегірткемен күресу жұмыстары фермерлермен бірлесіп жүргізілуде.
"Біз биылғыдай шегірткенің таралу аймағын бұрын-соңды кездестірген емеспіз. Біз оның таралуының ықтимал салдарын жете бағаламаймыз. АШМ Мемлекеттік инспекция комитетіне барлық рәсімдік мәселелерді дереу аяқтауды және барлық қажетті техниканы аталған өңірлерге жіберуді тапсырамын. Қарбалас уақытта біз штаб отырысын аптасына екі рет өткіземіз", — деп түйіндеді Серік Жұманғарин.
