Жосықсыз жер пайдаланушыларды Қазақстан өңірлеріндегі комиссиялар анықтайтын болады

Вице-премьер Серік Жұманғариннің төрағалығымен өткен Жер ресурстары мәселелері жөніндегі комиссияның отырысында аграршылардан жер учаскелерін алу мәселелері қаралды. Басты мәселе - уәкілетті органдарға осы шешімдерді қабылдау кезінде құқықтық өріс шеңберінде әрекет етуге мүмкіндік беретін адал және жосықсыз жер пайдаланушыларды айқындау үшін құқықтық база құру. Бұл туралы үкіметтің баспасөз қызметі хабарлады.

Ауыл шаруашылығы вице-министрінің төрағалығымен жұмыс тобы өңірлерде арнайы комиссиялар құру жөнінде ұсыныс әзірледі. Олар бірқатар критерийлер негізінде жерді пайдалану құқығын жалғастыру мәселесін реттеумен айналысатын болады.

Олардың қатарында жерді нысаналы мақсатына сәйкес пайдалану, салық төлеу, инвестициялар тарту, ауылдық аумақтарды дамыту және т.б. бар. Барлық заңды рәсімдерді сақтау үшін Ауыл шаруашылығы министрлігінің ережесіне мемлекеттік органға осы арнайы өңірлік комиссияның үлгілік ережесі мен іс-қимыл алгоритмін әзірлеу және бекіту жөніндегі құзыретті беру бөлігінде өзгерістер енгізіледі.

Үкіметтің мәліметінше, 2024 жылдың басынан бері мемлекет меншігіне 2 млн гектардан астам ауыл шаруашылығы жері қайтарылған. АШМ Жер ресурстарын басқару комитеті жалпы ауданы 2,8 млн га жер пайдаланушыларға қатысты жоспардан тыс 1750-ге жуық тексеру жүргізді. Олардың нәтижелері бойынша 2,2 млн га аумақта жер заңнамасын бұзушылықтарды жою туралы 1342 ұйғарым енгізілді.

Биыл берілген нұсқамалар бойынша 311,3 мың га алқапта ауыл шаруашылығы жерлерін игеру басталды. 200,4 мың га ауыл шаруашылығы жерлерін мәжбүрлеп алып қою бойынша сот талқылаулары жүргізілуде.

Бұдан басқа, әкімдіктердің ауданы 368,5 мың га ауыл шаруашылығы мақсатындағы жер учаскелерін беру туралы 875 заңсыз шешімі анықталды. Оның ішінде 84 шешім жойылды.