Майлы дақылдарды қайта өңдеушілердің Ұлттық қауымдастығының болжамы бойынша Қазақстанда майлы дақылдардың өнімі осы маусымда 850 мың тоннадан аспайды. Бұл 2022 жылғы көрсеткіштен 17% - ға аз. Ауа райының қолайсыздығы егіннің төмендеуіне себеп болды, деп хабарлады ҚР Ауыл шаруашылығы министрлігінің баспасөз қызметі.
Өсімдік майын өндіру мен экспорттау Қазақстан мен Ресейдің XIX өңіраралық ынтымақтастық форумы аясында талқыланды. Майлы дақылдарды қайта өңдеушілер Ұлттық қауымдастығының атқарушы директоры Александр Яшковтың айтуынша, май зауыттары шикізат тапшылығы жағдайында жұмыс істеуге мәжбүр болады.
"Бейінді министрліктер ел ішінде күнбағыс майы мен жоғары ақуызды жемшөп (күнжара, жом) өндіру үшін шикізатты қалай сақтау керектігі туралы ойлануы қажет. Енгізілген бажға қарамастан, күнбағыс тұқымының экспорты жалғасуда, 2022/2023 маусымында тұқымның экспорты 312,4 мың тоннаны құрады. Бір жыл бұрын бұл көрсеткіш 223,7 мың тонна деңгейінде болған", - деп түсіндірді Александр Яшков.
Күнбағыс тұқымына экспорттық баж 2023 жылдың ақпанынан бастап қолданылады. Қауымдастықтың мәліметінше, осы кезең ішінде ҚР-да күнбағыс майы өндірісі артты. 2022/2023 жылғы маусымның қорытындысы бойынша тазартылмаған күнбағыс майының өндірісі 417,6 мың тоннаны құрады, бұл өткен маусыммен салыстырғанда 50%-ға көп. Сондай-ақ тазартылған күнбағыс майының өндірісі артып, 145,3 мың тоннаға жетті.
Маусым қорытындысы бойынша бөтелкедегі майдың импорты 39,7 мың тоннаны құрап, 11,3% - ға қысқарды. Дайын өнімнің экспорты 77%-ға артып, 310,6 мың тоннаны құрады.
"Таяудағы үш жылда қазақ май өнімдерінің валюталық түсімі $700 млн-нан асуы мүмкін. 2022 жылғы нақты көрсеткіш - $521 млн. Біздің өнімдер Қытай бағытында да, Орталық Азия мен Еуропа бағытында да сатылады. Қазақстандық май өнімдерін импорттау бойынша екінші орында Өзбекстан тұр, сондай-ақ импорттаушылардың бестігіне Тәжікстан мен Латвия кіреді", - деді Александр Яшков.
