Бас прокуратурада мал ауруын жасыру туралы мәлімделді

Прокуратура қызметкерлері Ветеринариялық бақылау және қадағалау комитеті мен оның ведомстволық бағынысты ұйымдарына тексеру жүргізді. Нәтижесінде аса қауіпті аурулардың өршуін жасыру жағдайлары анықталды. Бұл туралы ҚР Бас прокуратурасының аға прокуроры Бауыржан Мұқашев Мәжілістің Аграрлық мәселелер жөніндегі комитетінің отырысында мәлімдеді.

"2022 жылы Ақмола облысында 14 мың бас ІҚМ аусыл ауруымен ауырған. Мұндай фактілер үш облыста бар", - деді аға прокурор.

Сондай-ақ, сібір жарасының таралуы туралы алаңдатарлық жағдай. Тек ресми деректер бойынша 2023 жылы Ақмола, Жамбыл, Түркістан және Қарағанды облыстарында сібір жарасы анықталды. 100 бас мал құлап, 37 адам жұқтырды, олардың бірі қайтыс болды. 2024 жылы Қостанай, Алматы және Жамбыл облыстарында сібір жарасы жағдайлары тіркелді.

"Жалпы, үш жыл ішінде аса қауіпті аурулардың 900-ден астам ошағы тіркелген. Бұл тек ресми, ал іс жүзінде көп нәрсе жасырылады. Мұны біздің тексерулеріміздің нәтижелері растайды", - деп атап өтті Бауыржан Мұқашев.