БҚО-да бордақылау алаңы бюджетке 158 млн теңге субсидия қайтарды

Батыс Қазақстан облысындағы "Ет Индустриясы" компаниясына ірі қара мал бордақылауға 158 млн теңге сомасында субсидиялар заңсыз төленді. Бұл туралы облыс прокуратурасының баспасөз қызметі хабарлады.

Ведомствоның мәліметінше, компанияның инвестициялық субсидия алуға өтінімінде қуаттылығы 5 мың мал орындық бордақылау алаңын қабылдау туралы көрсетілген.

"Сараптама қорытындысымен 4 800 мал орны расталды, өтінімде жұмыс жобасы жоқ, жобаның орнына өтінімге сараптама қорытындысы қоса берілді. Нысан аумағында инвестициялық жобаға жатпайтын өзге де ғимараттар мен құрылыстар салынды", - деп хабарлады прокуратура.

Бұдан басқа, ЖШС сатып алған ІҚМ-дің 853 асыл тұқымды басы - 536 Батыс Қазақстан облысынан тыс жерде, басқа шаруашылықтардан жалға алынған.

Осы факті бойынша аудан прокуратурасы БҚО ауыл шаруашылығы басқармасына ұсыныс енгізді. Уәкілетті орган 77 млн теңге сомасына бордақылау алаңын салу кезіндегі шығындарға және 80 млн теңге сомасына асыл тұқымды мал сатып алуға арналған субсидияларды өтеу туралы сотқа талап арыз берді.

"Ағымдағы жылы апелляциялық сатыдағы соттың шешімімен аталған залалды 158 млн теңгенің толық көлемінде өтеуге қол жеткізілді", - деп нақтылады прокуратура.