Атырау облысы бойынша "Қазсушар" мамандары Ойыл өзені арқылы тасқын суларды өңірдің 18 мың гектардан астам шабындық алқаптарын суаруға жіберді. Нәтижесінде Ойыл өзеніндегі су деңгейі төмендеді. Бұл туралы Су ресурстары және ирригация министрлігінің баспасөз қызметі хабарлады.
Сондай-ақ, Жайық өзенінен тасқын суларды суару жүйелеріне, сағаларға және Каспий теңізіне бағыттау жұмыстары жүргізілуде.
Тасқын суды қабылдайтын Сарыөзек каналының арнасы тазартылып, қорғаныс бөгеті нығайтылды. Каналдың төменгі бөлігінде ұзындығы 4,2 шақырым болатын жаңа канал қазылып, Атырау қаласының жанындағы Еркінқала ауылдық округінде 1500 гектар шабындық алқап суарылуда. Сарыөзек каналы арқылы тасқын сулар да Каспий теңізіне жіберіледі.
Тасқын суларды қауіпсіз өткізу үшін Бақсай каналының бойындағы құбырлар мен бөгеттер алынып тасталды. Теңізге су бұру үшін ұзындығы 4 шақырым болатын жаңа арна қазылып, Нарын каналының бас бөлігі тазартылды.
Бүгінгі таңда канал бойында орналасқан 4,5 гектар шабындық алқаптарды тасқын сулармен суару жүргізілуде.
"Бүгінгі күннің басты міндеттерінің бірі - тасқын суларды тиімді пайдалану. Жайық өзені арқылы Каспий теңізіне 1 млрд текше метрден астам су жіберілді. Сондай-ақ, көлдерді, сағаларды және жер асты суларының кен орындарын толтыру үшін су өткізу жалғасуда", - деді Су ресурстары және ирригация министрлігінің ресми өкілі Мөлдір Әбдуәлиева.
