Қазақстандық делегация Австралияда мал шаруашылығын жүргізу әдістерін зерделеді. Сапар қорытындысы бойынша елімізде ең үздік тәжірибелерді қалай енгізу керектігі туралы жоспар әзірленді. Пилоттық жобаға бірнеше озық шаруашылықтар қатысады. Бұл туралы ҚР премьер-министрінің баспасөз қызметі хабарлады.
ҚР премьер-министрінің орынбасары Серік Жұманғарин Австралияға жұмыс сапарының нәтижелерін делегация құрамындағы мал шаруашылығы басшыларымен - "Олжа Агро" ЖШС, "Терра" ЖШС, "Қарасу-Астық" ЖШС, "Қайып Ата" ЖШС, "Қайыңды"ЖШС-мен талқылады. Пилоттық жоба шеңберінде қазіргі заманғы австралиялық технологияларды ескере отырып, қолданыстағы өндірістерді салу және жаңғырту жүргізілетін болады.
Инвестициялық жобаларға мыналар кіреді: 2,5 мың басқа арналған репродуктор-шаруашылық құру, 5 мыңға арналған бордақылау алаңы және қайта өңдеу ("Олжа Агро" ЖШС, Қостанай облысы), 100 мың басқа арналған мега бордақылау алаңын салу, 1,2 мың гектарға суару ("Терра" ЖШС, БҚО), ет комбинатын жаңғырту және биогаз өндіру үшін жасыл технологияларды енгізу("Қарасу Астық" ЖШС, Қостанай облысы), жемшөп дақылдарын өсіру, мал биржасын және қалдықтарды терең өңдейтін ет комбинатын салу ("Қайып Ата" ЖШС, Түркістан облысы) Жетісудағы жаңа бордақылау алаңдарын салу және жұмыс істеп тұрған бордақылау алаңдарын кеңейту ("Қайыңды" ЖШС).
Пилоттық жобаның бірінші кезеңінде ауыл шаруашылығы мен қатысушы объектілердің жай-күйіне егжей-тегжейлі талдау және аудит жүргізу, яғни қолда бар ресурстарды, ағымдағы қызметті, даму жоспарларын бағалау, олардың әрбір кәсіпорын үшін қаншалықты қолданылатынын анықтау көзделеді. Бұл ретте қазақстандық аграрларға халықаралық мамандар тобы көмектеседі.
Екінші кезеңде – әрбір жобаны дамытудың қаржылық моделі мен бизнес-жоспарын әзірлеу, ал үшінші кезеңде – оны іске асыру тұр. Пилоттық жобаның кейбір қатысушыларының австралиялық технологиялармен жұмыс тәжірибесі бар екенін ескере отырып, нысандардың құрылысын 2024 жылдың көктемінде бастау жоспарлануда.
Қазіргі уақытта ауыл шаруашылығы министрлігі етті мал шаруашылығын дамытудың үш жылдық кезеңге арналған Жол картасын әзірлеуде. Құжатқа қазіргі заманғы экспортқа бағдарланған ет комбинаттарын, малдың орташа тәуліктік өсімін арттыруға және жоғары салмақтық жағдайларға қол жеткізу кезеңін қысқартуға ықпал ететін заманауи технологияларды пайдалану негізінде ІҚМ өсіру жөніндегі бордақылау алаңдарын құру жөніндегі шараларды енгізу жоспарлануда.
Қазақстандық кәсіпорындар базасында мал шаруашылығын жүргізудің австралиялық әдісін енгізу жөніндегі пилоттық жоба осы құжаттың тармақтарының бірі болып табылады.
