Ұлттық статистика бюросы алдағы ауылшаруашылық санағы үшін ақпараттық жүйелер мен қызметтерді тестіден өткізуде. Пилоттық санақ 2024 жылдың 20 тамызы мен 30 қыркүйегі аралығында өтеді. Үкімет отырысында премьер-министрдің орынбасары Серік Жұманғарин санаққа дайындық барысы туралы хабардар етті, деп хабарлады премьер-министрдің баспасөз қызметі.
"Респонденттер санақ парақтарын sanaq.gov.kz мамандандырылған сайтында өз бетінше онлайн режимінде толтыра алады. Сонымен қатар, бюроның аумақтық бөлімшелерінің қызметкерлері пилоттық жоба үшін арнайы іріктелген 54 елді мекенде үй шаруашылықтары өкілдеріне іріктеп сауалнама жүргізеді", - деп хабарлады баспасөз қызметінде.
Жиында мал шаруашылығы және өсімдік шаруашылығы бойынша статистикалық деректерді өзектендіру мәселелері талқыланды. Мал шаруашылығы бойынша 2023 жылғы деректер өзектендіріліп, Ұлттық статистика бюросының мамандандырылған бюллетенінде жарияланды. Ауыл шаруашылығы вице-министрі Азат Сұлтанов өсімдік шаруашылығы бойынша деректерді өзектендіруді тамыз айында аяқтау жоспарланып отырғанын айтты.
Жиынның қорытындысы бойынша вице-премьер Ұлттық статистика бюросына ауыл шаруашылығы санағын өткізудің мақсаттары мен тәртібі туралы халық арасында түсіндіру жұмыстарын жандандыруды, сондай-ақ өсімдік шаруашылығы бойынша деректерді өзектендіруді сапалы аяқтауды тапсырды.
