Ауыл шаруашылығы министрлігі ҚР Ауыл шаруашылығы дақылдарының селекциясы мен тұқым шаруашылығын дамытудың 2024-2028 жылдарға арналған Кешенді жоспарының жобасын әзірлеп, үкіметте таныстырды. Бұл туралы ҚР премьер-министрінің баспасөз қызметі хабарлады.
Ауыл шаруашылығы вице-министрі Ербол Тасжүреков атап өткендей, еліміздегі тұқым шаруашылығы жүйесі бұзылып, осы саладағы жұмыс істеп тұрған кәсіпорындар бөлшектеніп кетті.
"Қазақстан жүгері, жеміс-жидек, жидек, жаңғақ жемісті, күздік қара бидай, көкөніс, бақша, картоп тұқымы және қант қызылшасы сияқты дақылдар бойынша импортқа тәуелділігі жоғары. Олар бойынша отандық селекцияның тұқыммен қамтамасыз етілуі 10% - дан аз. Климаттың өзгеру жағдайында отандық селекция және тұқым шаруашылығы жүйесі фермерлерді ауруға және күйзелістік жағдайларға төзімді сұрыптармен қамтамасыз ете алмайды", - деді Тасжүреков.
Тағы бір маңызды мәселе - ол кадрларды даярлау мен жаңартудың өте төмен деңгейі. Жас мамандардың ағыны іс жүзінде жоқ, отандық селекционерлердің орташа жасы 61 жасты құрайды.
Салада жинақталған мәселелерді шешу үшін кешенді жоспар қалыптастырылды. Құжат 15 іс-шараны қамтиды, оның ішінде: аграрлық университеттердің зертханалық базасын заманауи жабдықтармен жарақтандыру; кадрлар даярлау, негізгі ауыл шаруашылығы дақылдарының сұрыптары мен будандарын өсіру бойынша шетелдік ғылыми институттармен ҰАҒБО бірлесіп жұмыс жасау; өсімдіктердің ұлттық генофондын, тұқымдарды, отырғызу материалдарын қадағалаудың цифрлық платформасын құру және басқа да шаралар.
Сонымен қатар, аграрлық ғылым жүйесін реформалау, атап айтқанда, ҰАҒБО-ны агротехнологиялық хабқа айналдыру жұмыстары басталды.
АШМ ақпараты бойынша, іске асырудан күтілетін нәтиже – аграрлық секторды отандық селекцияның отырғызу материалының қажетті көлемімен қамтамасыз ету және шетелдік тұқымдарға импортқа тәуелділікті төмендету.
Кешенді жоспар жобасын таныстыру қорытындысы бойынша барлық енгізілген іс-шараларды егжей-тегжейлі талқылау үшін ғылыми-зерттеу институттарының басшыларымен және селекция және тұқым шаруашылығы саласындағы жетекші қазақстандық ғалымдармен кездесу ұйымдастыру туралы шешім қабылданды.
