Астықты тікелей сатып алу бойынша Азық-түлік корпорациясы 3,4 млрд теңге төледі

Фермерлік қожалықтар Азық-түлік корпорациясының элеваторларына тікелей сатып алу бағдарламасы бойынша 52 мың тонна астық жөнелтті, бұл жоспарланған жеткізу көлемінің үштен бірі. 25 желтоқсандағы жағдай бойынша оператор ауыл шаруашылығы өндірушілерінің шоттарына өз қаражатынан 3,4 млрд теңге аударды, деп хабарлады Азық-түлік корпорациясының баспасөз қызметі.

Бағдарламаның шарттары бойынша Азық-түлік корпорациясы фермерлік шаруашылықтардан үшінші, төртінші және бесінші класты бидайды, сондай-ақ екінші класты арпаны қабылдауда. Келіп түскен астықтың барлық көлемінің ең үлкен үлесін құрамында 23% және 25% балауызы бар үшінші класты бидай алады.

Қазақстан өңірлері бөлінісінде астық жеткізушілер арасында дәстүрлі түрде Солтүстік Қазақстан, Қостанай және Ақмола облыстары көш бастап тұр. Осы облыстардың фермерлері астық операторының элеваторларына тиісінше 20,9 мың тонна, 18,4 мың тонна және 12,5 мың тонна жөнелтті.

Өтінімдерді қабылдау кезінде шағын агроөнеркәсіп кешендеріне басымдық беріледі.

"Артық өнімді сатып алу шағын және орта шаруашылықтарға ауыл шаруашылығы өндірісінің рентабельділігін сақтауға көмектеседі. Бұл ретте Азық-түлік корпорациясы мемлекеттік оператор ретінде астықтың әділ құнын белгілей отырып, нарықтағы бағаны теңестіруге ықпал етеді", - деп атап өтті Азық-түлік корпорациясының Басқарма төрағасы Асылхан Джувашев.

Астықты сатуға барлығы 440 ауыл шаруашылығы кәсіпорны, оның ішінде 347 шағын шаруашылық, 93 орта компания (ЖШС) өтінім берді. Бүгінгі таңда агроқұрылымдар Азық-түлік корпорацияларына 6,9 млрд теңгеге тағы 98,2 мың тонна бидай жеткізуге дайын. Жеткізілген астық үшін төлемді оператор ақшалай қаражат бөлінгеннен кейін бірден жалғастырады.

Нарықта астық сатып алуға барлығы 13 млрд теңге бағытталады, бұл ауыл шаруашылығы өндірушілерінен 200 мың тонна астық өнімін сатып алуды қамтамасыз етеді.