"Ауыл аманаты" бағдарламасын жүзеге асыру барысында Қазақстанда 400-ден астам ауыл шаруашылығы кооперативі құрылды, оның 319-ы 6,7 млрд теңгеге жеңілдікпен қаржыландырылды. Кооперацияны одан әрі қолдау үшін үкімет жаңа қаржылық ынталандырулар енгізеді. Бұл туралы ҚР премьер-министрінің баспасөз қызметі хабарлады.
Бүгінгі күні ауыл шаруашылығы кооперативтеріне қалған ауыл шаруашылығы өндірушілерімен тең шарттарда, оның ішінде жергілікті бюджеттер есебінен мемлекеттік қолдаудың барлық шаралары қолжетімді. Атап айтқанда, кооперативтер құруды ынталандыру және оларды қолдау мақсатында "Ауыл аманаты" бағдарламасы шеңберінде 8 мың АЕК-ке дейін несие беру көзделген.
Сонымен қатар, Ауыл шаруашылығы министрлігі кооперативтерге ауыл шаруашылығы техникасын беру тетіктерін әзірледі, осы мақсатта ауылдық елді мекендер мен шағын қалалардағы шағын несиелеу ережелеріне өзгерістер мен толықтырулар енгізу жоспарлануда.
Сондай-ақ, инвестициялық субсидиялау қағидаларында жергілікті бюджет қаражаты есебінен ауыл шаруашылығы техникасы мен ауыл шаруашылығы кооперативтері үшін жабдықтардың жекелеген түрлері бойынша құнын 50% - ға дейін субсидиялауға басымдық және жоғары нормативтер көзделген. Салық кодексінде - барлық салықтар бойынша 70% жеңілдікті көздейтін арнайы салық режимі.
Баспасөз қызметінің мәліметінше, "Ауыл аманаты" қатысушыларына бүгінгі таңда 90,7 млрд теңге сомасына 14,4 мың шағын несие берілген. Қаражаттың 80%-ы мал шаруашылығына, 4%-ы өсімдік шаруашылығына, 5%-ы техника мен жабдықтар сатып алуға және 11%-ы қызметтің басқа салаларына бағытталған. Бағдарлама шеңберінде салық түсімдерінің сомасы 1,3 млрд теңгені құрады. 16 мың жаңа жұмыс орны құрылды.
Ағымдағы жылы бағдарламаны іске асыруға 80 млрд теңге қарастырылып, 10,8 мың шағын несие беріліп, 18 мыңнан астам жұмыс орны ашылады.
