Абай облысында сібір жарасына күдік расталмады

Абай облысының Жетіжар ауылында карантин алынып тасталды, себебі жергілікті тұрғынның алдын ала "сібір жарасы" диагнозы расталмады. Бұл туралы облыс әкімдігінде хабарлады.

"Аудан әкімінің 2023 жылғы 25 қыркүйектегі шешіміне сәйкес Жетіжар ауылында зарарсыздандыру жұмыстарының аяқталуына байланысты төтенше жағдай режимі жойылды. Бесқарағай ауданы Жетіжар ауылының тұрғынының ПТР-тестінің нәтижелері теріс, қан мен жара сұйықтығының анализі аурудың белгілерін анықтаған жоқ", - деп хабарлады әкімдікте.

Қазіргі уақытта Жетіжар ауылының тұрғыны емдеуді жалғастыруда, жағдайы тұрақты, дене температурасы қалыпты.

Бұрын ауыл тұрғыны сібір жарасына күдікпен ауруханаға түскен. Жергілікті билік Жетіжар ауылында ТЖ режимін енгізді. Ауылға кіре берісте санитарлық бекет орнатылып ауыл шаруашылығы өнімдерін әкету уақытша шектелді.